TAGBILARAN CITY, Bohol , Feb 21 (PIA)— Billing statement nga makuha na dayun dungan sa meter reading, kini ang bag-ong teknolohiya nga gipa-ila-ila sa Bohol Light, sugod niadtong Pebrero 19.
Ang napa-ugmad nga serbisyo alang sa mga customer sa Tagbilaran City, gitawag og Spot Billing system: diin mawala na niini ang pag-paabut sa mga konsumidor sa breakdown sa ilang mga balayranan sa konsumo sa koryente, pila ka adlaw pa human sa mater reading.
Nunot niini, alang sa mga konsumidor, ang dayag ug hamogaway nga sistema, ang pag-paubos sa balayranan ug pagpamoderno sa serbisyo, mao ang mas gikinahanglan kay sa lalis kon nganong gibaligya ang utility nga iya sa kagamhanan.
Lain na usab nga pagpamatuod sa saad sa bag-ong kompanya nga nakapalit sa daan nga Bohol Light Company Incorporated, ang bag-ong kompanya nga ilhon na nga Bohol Light, misaad sa mas maayo ug mas paspas pa nga serbisyo kon itandi sa kanhi nga kompanya.
Kalakip na sa panumpa sa kompanya nga iyang ipamoderno ang pagpadagan sa utility aron kubsan ang mga usik ug hatagan sa mas sayun ug hamogaway nga kasinatian ang mga konsumidor.
Wala na ang panahon nga magpaabut pa ka sa imong bill nga ideliversa inyong balay human mabasa ang inyong metro. Sa Bohol Light, ang mga konsumidor, makadawat dayon sa kopya sa ilang billing lakip na niini ang breakdown sa gibayaran, para mas sayun na usab sa konsumidor makapangandam sa ilang bayad.
Didto sa bill makit-an na dayun ang konsumo, ang mga gikarga nga mga balayranan, kon kanus-a kinahanglang bayaran aron maseguro ang tino ug tin-aw nga pagsabut.
“Nakasabut kita nga gusto sa atong mga konsumidor ang dayagug hamogaway nga tarsaksyon, mao nga ang Spot Billing atong gidesenyo aron mahatagan sila sa kasayuran sa tataw ug sayon sabton nga format,” matud pa ni Roel Z. Castro, Presidente ug CEO sa Bohol Light.
Gani, sa mga sistema nga gipahamutang sa Bohol Light, dili na kinahanglan pa sa konsumidor nga personal nga mopila aron mobayad sa bill, tungod kay, sa pilosopiya sa dayag ug hamogaway nga serbisyo, pwede sa Bohol Light ang online payment didto sa labing duol nga third-party collecting agents niini. (PIABohol)
