DUHA ka gatus ka mga Tilapia breeder ang dungan nga gibuhian sa pagpangulo ni Gobernador Erico Aristotle Aumentado, atol sa gipahigayon nga ceremonial release niini didto sa usa ka pond nga adunay sukod 10 by 5 ka metros, diin kabahin kini sa Tilapia Hatchery Facility sa Valencia.
Dungan usab nga gipahigayon, nianang adlawa, Pebrero 18, 2025 ang inagurasyon sa maong pasilidad nga naangkon sa munisipalidad sa Valencia pinaagi sa proyekto sa kagamhanang probinsyal nga Establishment of Municipal Freshwater Fish Hatchery alang sa upat ka benepisyaryo nga munisipalidad: Valencia, Talibon, Carmen ug Pilar.
Sa maong upat ka munisipalidad nga nakadawat sa pondo kantidad P1.5 Milyones pinaagi sa Office of the Provincial Agriculturist (OPA), si Valencia Mayor Dionisio Neil Balite ang paspas nga naka-implementar sa maong proyekto.
Ang Bureau of Fishery and Aquatic Resources (BFAR) mitambayayong sa maong proyekto pinaagi sa paghatag og suportang teknikal ug tilapia breeders nga gilangkob sa 150 ka mga baye ug 50 ka mga laki nga tilapia.
Matud ni Micah Mae Digamo sa BFAR-Clarin, pinaagi sa 200 ka breeders, makakuha gikan niini og 50,000 ngadto 100,000 ka mga fry (Tilapia), sulod sa usa ka cycle, diin mudangat sa 45 ka adlaw ang pagpakondisyon sa mga breeders aron makakuha sa ingon niana nga gidaghanon.
Si Ma. Rocile Angela Josol sa BFAR-Bohol, nagkanayon nga mahimong makabaton og 6 ngadto sa 8 ka cycle sa maong pagpadaghan sa tilapia sa usa ka tuig. Pagdugang niini 20 sentimos ang presyuhan sa matag fingerling, apan ang mga interesado nga magbuhi og tilapia o magpadaghan niini, mahimo nga muduol sa BFAR, kung kini adunay kaugalingon nga kabutangan(pond) sa fingerlings.
Atol sa mubo nga programa, mipadayag ang Punong Barangay sa Marawis, Valencia Kap. Nido Tagaan sa pagsuporta sa mga programa sa Kagamhanang Probinsyal ubos sa liderato ni Aumentado.
Ang Executive Assistant sa Gobernador Nunila Pinat midasig sa katawhan pagdumala ug pagpanalipod sa kalikopan alang sa epektibo nga pagpadaghan sa produksyon.
Sa laing bahin, ang Gobernador nagkanayon nga ang inagurasyon sa Tilapia Hatchery Facility sa Barangay Marawis, Valencia unang tikang alang sa mas gipakusgan nga programa pagpadaghan sa isda pinaagi sa Tilapia production.
“Kining maong programa, tubag nato kini sa kakulangan sa mga isda. Naningkamot ang Provincial Government nga makahatag og dugang supply, kay usa kini ka pamaagi nga makatabang ta sa atong mga kaigsoonang kabus.”
Gipadangat ni Valencia Mayor Dionisio Neil Balite ang pagpasalamat ngadto sa Gobernador sa dakong suporta niini ngadto sa mga mananagat ug mag-uuma sa Valencia.
Sa laing bahin si Aumentado subli nga mipahinumdum sa katawhan nga ampingan ang kalikopan kay nagkanihit ang isda gumikan sa pag-abuso ra usab sa kadagatan sama sa illegal fishing.
Mipahibalo kini sa katawhan nga andam ang Kagamhanang Probinsyal paghatag ngadto sa mga organisadong grupo sa mga mananagat og commercial fishing boat nga kumpleto ang himan, aron makapanagat kini ngadto sa lagyong dapit ug ang maong kapunungan mao ang mubaligya sa abot aron mapakgang ang pagkontrolar sa mga kumprador sa presyuhan sa isda
Malaumon ang Gobernador nga ang gipakusgan nga produksyon sa tilapia makatabang pagpaubos sa presyo sa isda, maghatag og kapanginabuhian ug magpakunhod sa kapobrehon sa lalawigan. (RTB)
