ANDAM na ang SM Supermalls sa pagpahigayon og Groundbreaking Ceremony sa SM City Tagbilaran ning buwan sa Pebrero. Kini mao ang pamahayag sa SM Supermalls Regional Head-operations, Antonio Jayme M. Del Prado, sa pagpakighinabi niini kang Gobernador Erico Aristotle Aumentado kauban sa Provincial Administrator Asteria Caberte.
Kini ang hinungdan sa pagbisita sa mga opisyales sa SM, ngadto sa Gobernador, didto sa Kapitolyo, Pebrero 12, aron kapangandaman ang kalihukan.
Si Del Prado kuyog sa SM Assistant Mall Manager, John Den Aranas ug SM Marketing Officer Ken Ceciban, mipahibalo kang Aumentado nga ang maong groundbreaking ceremony pagatambungan sa Presidente sa SM nga si Steven Tan diin importante nga kabahin sa okasyon ang presensya ni Gobernador Aris Aumentado isip Gobernador sa Bohol ug City Mayor Jane Yap isip hepe sa Lokal nga Ehekutibo.
Si Aumentado kansang Strategic Change Agenda, nagtumong sa pagpalambo sa ekonomiya, mipadangat sa pagpasalamat ngadto sa SM, gumikan, matud pa nga ang pagpang-imbita niini og dagkong mga magpapatigayon maghatag og katumanan sa iyang tinguha nga dugang job opportunities para sa katawhang Bol-anon.
Sumala sa tinubdan, ang SM City Tagbilaran, usa ka tulo ka andana nga edepisyo diin adunay sukod sa floor area nga 20,000 metros kwarado matag andana, ug pagatukuron human ipahigayon ang Capsule Laying ug Groundbreaking Ceremony pipila ka adlaw gikan karon.
Gi-ekspresar sa Gobernador ug sa Provincial Administrator, ang ilang kalipay nga pipila ka bulan human gipakural ang lote nga gipanag-iya sa SM alang sa maong patigayon, napalapdan na usab ang agianan nga sikbit sa maong lote alang sa hamugaway nga transportasyon paingun sa maong dapit.
Gilauman sa administrasyon ni Aumentado nga ang pagsulod sa SM sa Bohol, maghatag og dakong oportunidad sa mas himsog nga dagan sa ekonomiya gumikan sa kompetisyon sa mga dagkong magpapatigayon, magpaubos sa presyo sa nag-unang palaliton ug magmugna sa daghang trabaho ngadto sa katawhan.
“Daghang salamat SM sa inyong pagpatambayayong sa among tinguha pagpalambo sa among ekonomiya,” pamahayag ni Aumentado.
Ang SM City Tagbilaran Groundbreaking mao ang unang ipahigayon ning maong tuig human sa Puregold kansang groundbreaking gipahigayon sa Ubay sa nakalabay nga tuig, diin gitukuran usab dayon sa edepisyo ug pagasugdan ang operasyon sa labing dali nga panahon. (RTB)
