MIKABAT sa P709,110 ang kantidad sa upat ka tseke nga dala ni Gobernador Erico Aristotle Aumentado, samtang nagpahigayon kini sa naandan nga Duaw ug Kukabildo ngadto sa kabarangayan.
Sa Hagbuaya, Catigbian, P200,000 ang gitunol niini ngadto kang Kapitan Joel Butal, pagpasemento sa ilang mga agianan sa barangay.
Para sa Barangay Haguilanan, Catigbian, P200,000 ang gitunol sa Gobernador ngadto kang Kapitan Liborio Tabaco Jr. aron maabunohan og anopog ang mga agianan sa ilang barangay.
P110,00 usab ang iyang gihatod ngadto kang Kapitan Ruel Jaum sa Barangay Alegria, Catigbian para sa pagpaayo sa mga purok niini. Aktwal nga nakita sa Gobernador ang pagpanginahanglan sa barangay og usa ka multi-purpose building.
Misaad ang Gobernador paggahin og pondo nga tres milyones para sa Barangay Haguilanan aron makabaton og hamugaway nga tapukanan ang barangay panahon kung dunay mga kalamidad.
“Hinaot ko nga magpadayon mo magkahiusa, magtinabangay ug labaw sa tanan, ipakita ang inyong mainitong suporta sa inyong barangay opisyales,” emosyonal nga pamahayag sa Gobernador isip pagdasig sa katawhan nga suportahan ang kakugi sa ilang Kapitan.
Matud ni Aumentado nga ang tibuok ug mainiton nga pagsuporta sa katawhan ngadto sa mga opisyales sa barangay ilabina sa kapitan maghatod og dako nga kalamboan sa katawhan.
Ang Gobernador padayon nga aktibo sa Duaw ug Kukabildo aron maihatod ang iyang gitinguha nga suporta ngadto sa mga programa sa 1,109 ka barangay tibuok lalawigan, pondo gikan sa iyang buhatan.
Samtang sa laing bahin, mipatighulog ang grupo ngadto sa Patrocinio, Cortes aron ikahatag usab ngadto sa barangay ang ayuda kantidad og P199,110 para sa ilang panginahanglan og tanke ilang waterworks system. Gidawat kini ni Kapitana Aires Torralba.
Kauban sa Gobernador sa maong Duaw ug Kukabildo ang mga bokal sa Sangguniang Panlalawigan nga sila Lucille Lagunay, ug Nicanor Besas. (RTB)
