NANAWAGAN ang batan-ong sakop sa Sangguniang Panlalawigan (SP) alang sa pagpalig-on batok sa access sa porn sites nga gituohang maoy hinungdan nga daghang mga bastos ug immoral nga mga tawo karon subay sa pagkatap sa gitawag nga “digital revolution”
Sumala pa ni Bokal DJ Balite sa ikatulong distrito sa Bohol nga atol sa regular nga sesyon sunod semana, ilang ipatawag ang kapolisan sa Bohol aron palig-onon ang kampanya batok sa cyber-pornography kay matud pa sayon na kaayo kini karon ma access diha sa internet.
Nanawagan usab si BM Balite nga ang mga public wi-fi services sa lalawigan ipang-block ang bisan unsang porn site ug gidasig sab ang mga pribadong Wi-Fi providers nga sundon kini.
Gihangyo usab ni BM Balite ang kapolisan sa lalawian nga ipatuman ang balaud batok sa Human Trafficking ug Online Sexual Abuse and Exploitation of Children.
Kini nga panawagan sa batan-ong Bokal mitumaw human sa pagsaka sa teknolohiyang pang-impormasyon nga nag-uban sa industriyal nga rebolusyon.
Matud niya, samtang nasinati sa katawhan ang ikaupat nga industriyal nga rebolusyon, nahimo usab kining plataporma sa paghimo og krimen.
Ingon nga pruweba, iyang gisubli ang balita kalabot sa usa ka 8-anyos nga batang babaye gitabangan og lugos sa mga menor de edad nga naka access sa porn site pinaagi sa Piso wi-fi didto sa lalawigan sa Sugbu..
Matod ni Balite, nakapukaw kini sa iyang kabalaka nga kining modernong teknolohiya nakapasayon naman hinuon pag-access sa mga kabataan bisan kadtong mga gidili ug immoral.
“Dali ug yano nalang kaayo ma-access, or masud sa mga menor de edad ang porn sites sa internet,” matud niini.
“Kini usa ka dakong kabalaka kay halos kita tanan naggamit na sa social media, menor de edad man o hamtong; Ang tanan adunay access sa social media”. Matud niya, usa nalang ka click, makasulod na dayon og porn sites ang si bisan kinsa apil mga bata.
Iyang gipahinumdoman nga dunay probisyon nga Seksyon 3 sa Republic Act 10364 nga nagdili sa pornograpiya dinhi sa nasud.
Gusto niya nga molihok ang katilingban ilabi na ang Simbahan aron matabangan ang kagamhanan sa dakbayan sa pagbatok ani.
“I call on the religious sector of the Philippines. We are Catholics, and we should do something about this, not just let our churches remain silent. This is a question of moral decay,” dugang pa ni sa Balite.
Sa katapusan, miingon si BM Balite nga panahon na usab karon nga ang nasudnong kagamhanan magpatuman og lig-on nga mga lakang batok niini nga isyu. (RTB)
