TULO ka barangay ang giduaw ni Gobernador Erico Aristotle Aumentado niadtong Pebrero 06, 2025 kauban si Board Member Lucille Lagunay, naghatod ug ayuda alang sa nag-unang panginahanglan sa barangay Catagbacan Norte ug Cansubayon, Loon ug Barangay Cansibuan, Antequera, para sa ilang mga proyekto.
Ang Catagbacan Norte, Loon midawat sa kantidad nga P200,000 pondo gikan sa buhatan sa Gobernador, isip abag sa ilang panginahanglan og sound system sa ilang mga General Assembly ug uban pang kalihukan, samtang ang barangay Cansubayon sa susamang lungsod, proyektong pang waterworks ang gamitan sa P200,000 nga ilang nadawat.
Sa laing bahin, mikabat sa P680,000 ang nadawat sa Barangay Cansibuan, lungsod sa Antequera, human gitunol sa Gobernador ngadto kang Kapitana Edwina Tiu ang tseke balor og P200,000 para sa proyektong solar street lights ug laing tseke nga nagkantidad og P480,000 abot gikan sa quarry sa ilang barangay.
Namahayag sa pasalamat si Kapitana Tiu sa kasamtangang Administrasyon, tungod sa dako nga pahat sa ilang barangay sa buhis sa quarry, diin matud pa niini, karon lang sa panahon ni Aumentado nahitabo ang dakong pagsaka sa pahat sa buhis sa quarry sa ilang barangay.
Ang LGU-Antequera midawat usab sa tseke gikan sa Gobernador, nga nagkantidad og Php360,000 isip pahat sa buhis sa sand and gravel gikan sa quarry sa Barangay Cansibuan.
Si Aumentado sa iyang bahin nagkanayon, nga gipanghingusgan sa kasamtangang Administrasyon ang pagpatuman sa insaktong pagkolekta sa buhis sa balas, anopog ug uban pa nga abot sa quarry isip kabahin sa gipatuman nga limpyong panggobyerno, apan higpit usab nga gipahimutang ang mga pamaagi pagpanalipod sa kalikopan aron mulungtad kini hangtod sa sunod pa nga mga henerasyon.
Malaumon ang Gobernador nga masabtan sa publiko ang mga lakang sa Pangagamhanan sa balanse nga pagdumala nga masuportahan ang panginahanglan sa katawhan, mapalambo ang ekonomiya ug mapanalipdan ang kalikopan uban ang natural nga kahinguhaan. (RTB)
