USA ka tuig nga bata nalumos sa balde nga gisudlan sa tubig sa hilit nga baryo sa Sagbayan niadtong Martes sa buntag.
Si Police Capy. Erick Binangbang, hepe sa Sagbayan Police Station, niingon nga napalgan ang masuso nga nagbuy-od nga naglubog sa tubig ang ulo.
Ang masuso daling gidala sa Rural Health Unit sa lungsod. Gisuwayan pag-resuscitate sa attending physician ang bata apan gideklarar kini nga patay na.
“Gikuha ang bata sa igsuon nga giingon nila nga wa nay kinabuhi pero may pulso pa mao nga gidala sa RHU diin gi-CPR pero niabot og pipila ka minuto nga napupos ang iyang kinabuhi,” matod ni Binangbang.
Matod ni Binangbang, namahaw ang mga ginikanan sa masuso dihang nahitabo ang insidente.
Ilang gihangyo ang ilang singko anyos nga anak nga susihon ang iyang manghod apan ulahi na ang tanan. Nasuta nga nalumos na ang masuso. (RTB)
