NABULABOG sa makadiyot ang mga Bol-anon human usa ka linog ang nasinati Huwebes sa buntag, Enero 23.
Sumala pa sa Philippine Institute of Volcanology and Seismology usa ka 5.8 magnitude nga linog nga tectonic ang origin sa San Francisco, Southern Leyte.
Base sa mga natala nga intensities ang Intensity VI-San Francisco, Southern Leyte; Intensity V – Ubay, Bohol.
Samtang Intensity III sa Cebu City; Intensity II – Tubigon, Bohol; Catmon, Danao City, City of Naga, City of Talisay, Cebu; Lapu-Lapu City; Mandaue City.
Adunay mga natala usab nga kadaut sa mga dalan ug panimalay base sa hulagway nga gipagawas sa pipila ka mga apektadong residente sa San Francisco Southern Leyte ug sa Office of the Civil Defense.
Subay niini,, usa ka intensity V nga linog ang nabati sa pipila ka bahin sa Bohol sayo sa Huwebes, usa ka opisyal sa Philippine Institute of Volcanology and Seismology (Phivolcs).
Matod sa hepe sa Phivolcs Bohol nga si Nolan Evangelista, ang magnitude-5.9 nga linog niigo sa 7 kilometros habagatan-sidlakan sa San Francisco, Southern Leyte alas 7:39 sa buntag.
Ang mosunod nga mga dapit natay-og usab sa linog: Carlos P. Garcia – Intensity V, Trinitad – Intensity IV, ug Jagna – Intensity III.
“Naa pa tay na-record nga tulo pa pero segurado mi nga nadawat na sab sa Alicia, Mabini, Candijay, ug ubang lungsod sud sa habagatang-silangan sa Bohol,” matod ni Evangelista.
Matod ni Evangelista, gamay nga danyos ang gitaho sa lungsod sa Carlos P. Garcia apan walay naangol.
Ang Phivolcs niingon nga tectonic ang gigikanan sa linog ug niigo sa gilawmon nga 14 km ubos sa yuta.
Si Evangelista midugang nga ang linog lagmit naggikan sa Philippine fault zone nga magsugod sa Luzon ug motadlas sa Leyte paingon sa Davao sa Mindanao. (RTB).
