NATALA sa mga otoridad ang mga kaso sa African swine fever (ASF) sa upat ka barangay sa lalawigan sa Bohol.
Niingon si Rommy Garcia, supervising agriculturist sa Office of the Provincial Veterinarian, nga ang pinakaulahing kaso sa maong sakit na-detect sa Barangay Nueva Vida Norte sa lungsod sa Carmen niadtong Disyembre 28, 2024.
Kini ang nag-aghat sa kagamhanang probinsiyal sa pagpahigayon ug depopulasyon sa palibot sa mga baboy sulod sa 100-metros nga radius diin unang nadiskubre ang virus sa baryo.
“Ga meeting na ta with our counterparts sa municipal LGU sa Carmen sa pag implemetar sa checkpoints ug ubang border control measures,” matod ni Garcia.
Samtang, ang mga lugar sa sulod sa 300 metros nga radius ipaubos sa surveillance aron matino kung ang sakit mikaylap.
Ang mga sample gikan sa mga baboy sulod sa samang lugar gipailalom sa pagsulay.
Matod ni Garcia, hugot usab nga gidili ang pagdala sa mga baboy paingon ug gikan sa maong lugar.
Ang grabe nga makatakod ug makamatay nga sakit nga viral nga nakaapekto lamang sa mga baboy nakita usab kaniadto sa mga barangay sa Poblacion Norte, Batuan; Barangay Bayongan, San Miguel boundary ug San Francisco, Ubay.
Ang susamang safety protocols aron malikayan ang pagkuyanap sa maong sakit gipatuman usab sa nahisgutang mga lungsod. (RTB)
