UPAT ka mga dinagko nga proyekto alang sa Bohol ang gipahiluna sa Provincial Development Council (PDC) nga nagtigum sa katapusang higayon sa 2024, aron opisyal na kining maduso sa Regional Development Council (RDC-7) ug masukip sa mga prayoridad sa Central Visayas nga pundohan sa nasudnong kagamhanan.
Sa katapusang tigum sa PDC, ang Full Council mi-aprobar sa tulo ka dagkong mga proyekto ngadto sa RDC, isip mga mahinungdanong proyekto ug mga programa alang sa malungtarong ekonomiya sa Bohol, ubos sa Administrasyon ni Gobernador Erico Aristotle Aumentado.
Kini usab samtang gilatid sa administrasyon ang strategic development agenda nga magseguro na planado ang pag-paugmad sa lalawigan, kasaligan ug malungtaron nga serbisyo ug kaugmaran nga habig sa kalikopan alang usab sa kalambuan sa kinabuhi sa matag Bol-anon.
Sa pagtimon ni Gob Aumentado ug ni Provincial Administrator Asteria Caberte, nahi-usa ang konseho nga gilakipan sa mga mayor ug mga hepe sa tanang buhatan sa Kapitolyo sa pagduso ngadto sa RDC sa Cacao Value chain Analysis, subay sa sugyot sa Philippine Rural Development Project (PRDP) ug ang Panahon ng Pagkilos -Philippine Community Resilience project nga gisugyot usab sa Department of Social Welfare and Development.
Sa laing bahin, ang PDC, mirekomendar usab sa pagduso sa proyekto sa Department of Environment and Natural Resources (DENR) kabahin sa Integrated Watershed Management Plan para sa Ipil Watershed sa lungsod sa Trinidad, nga gipanglantawan nga mahimong usa ka maayong tinubdan sa tubig mainom sa rehiyon, patubig alang sa agrikultura, ug ang pagpahiluna sa mga lakang sa kinatibuk-ang pahiuli sa kinaiyahan.
Ug bisan pa kon may taas pa nga andamonon alang sa higanteng proyekto, gisukip na ug gituki sa PDC ang tanyag sa nasudnong kagamhanan ngadto sa gobernador kabahin sa Bulk Water Supply Project nga una na’ng gisugyot sa mga nanglabay nga administrasyon apan nagpabiling anaa lamang sa konsepto.
Kahinumduman nga gitanyag ngadto kang Gobernador Aumentado sa nasudnong kagamhanan ang posibilidad nga pundohan sa World Bank pinaagi sa nasudnong kagamhanan ang usa ka dinagko nga proyekto.
Diha-diha, giduso sa gobernador ang Bulk Water Supply Project nga pundohan pinaagi sa paghuwam sa nasudnong kagamhanan sa World Bank, apan ang paggamit niining hinulaman nga pundo, ipiyal sa kagamhanan sa Bohol sa dagway nga grant.
Wala pa man mahipno ang mga detalye sa WOrldBank ug sa Kagamhanan sa Pilipinas, una na nga gipalusot sa PDC ang hangyo sa pagpundo sa proyekto, isip usa sa mga mahinungdanong lakang aron kini, kapundohan.
Kon ang uban nga opisyal, maghuwat pa hangtud mahipno na ang kasabutan sa ibabaw tali sa Kagamhanan sa Pilipinas ug World Bank, si Aumentado, naneguro na nga lihokon ang mga angay himoon sa ubos, aron mas mapadali pa ang pagpakanaug sa pundo alang niini.
Gipaabut usab nga aghaton sa gobernador ang Sangguniang Panlalawigan aron kahimoan ug gahum si Aumentado nga makasugod na sa pagpakigsabut sa mga hingtungdan nga mopundo sa proyekto.
Matud ni Aumentado, isip amahan sa lalawigan, manghinaut siya nga magkahiusa ang mga hepe ehikutibo sa matag lungsod dinhi, aron hugpongan ang suporta sa bulk water supply project, aron pinaagi sa RDC, mapadala na ang rekomendasyon ngadto sa National Economic Development Authority NEDA Board ug kasugdan na og timbang sa WorldBank.
Ang tigum sa PDC Full Council didto sa Capitol Ceremonial Hall, gitambongan sa mga Board Members sa hunta Probinsyal, mga representante sa nasudnong ahensya, mga non-government organizations, Department Heads, ug uban pang kaabag sa pagpanerbisyo. (rahc/PIA7/Bohol)
