GIPAABOT nga ang probinsya sa Bohol makasinati og grabeng huwaw sugod sa buwan sa Marso sunod tuig tungod sa El Niño Phenomenon.
Matod ni Leonard Samar, hepe sa Philippine Atmospheric, Geophysical and Astronomical Services Administration (PAGASA) – Bohol, nga ang probinsiya nalakip sa 65 ka probinsiya nga gilista sa Department of Science and Technology isip usa sa posibleng makasinati sa epekto sa El Niño.
“Base sa nationwide nga assessment sa El Nino, dry condition, dry spell ug drought mao nay nakita nga more than 70 percent whole Philippines ang apektado,” matod ni Samar.
Samtang ang grabe nga hulaw gilauman nga magsugod sa Marso, ang probinsya magsugod na sa uga nga kahimtang sa Enero.
Hinuon namatikdan ni Samar nga ang epekto sa El Nino dili pa hingpit nga mabati sa Bohol nga bag-o lang gikusokuso sa kusog nga ulan tungod sa Tropical Storm Kabayan.
Sa laing bahin, gisugdan na sa Provincial Disaster Risk Reduction Management Council sa probinsiya ang pagpangandam alang sa nag-ung-ong nga epekto sa El Nino.
Usa sa mga posibleng lakang nga himuon sa probinsiya mao ang pagpahigayon og cloud-seeding operations aron makatabang sa paghatag og tubig sa mga mag-uuma sa tibuok isla. (RTB)
