TAGBILARAN CITY, Bohol, Nob 25 (PIA)—Pinaagi sa Executive Order No 52, gideklara n ani Gob Erico Aristotle Aumentado ang nakompirmar nga pagkatag sa sakit nga African Swine Fever (ASF) didto sa San Vicene San Miguel, Bohol samtang gilatid na niini ang mga lugar nga isulod sa estrikto nga kwarantina ug ang mga lugar gawas sa kwarantina apan may angay pa nga mga sundon nga protocols.
Kahinumduman nga Nob 22, nakuha sa Office of the Provincial Veterinarian (OPV) ang tawag aron ipaimbestigar ang pagpangamatay sa mga baboy sa nahisgutang barangay.
Nagpositibo ang pipila ka mga blood samples nga nakolekta gikan sa mga baboy nga may impeksyon sa Purok 3, ug Purok 6, nga nagpositibo, subay sa resulta sa Department of Agriculture Central PCR Veterinary Analyzer.
Sa panginahanglan nga madali ang pagpahimutang sa mga babag aron dili makagawas ang kagaw, gideklara na dayun sa EO ang mga lugar nga ipailawom sa hugot nga pagbantay.
Nunot niini, ang tanang buhi nga baboy sulod sa mga lugar nga natumbok ang sakit, hutdon og pamatay, bisan pa kon wala kini positibo nga kompirmasyon sa sakit.
Sulod sa tulo ka buwan, wala baboy nga makasulod ug makagawas gikan niining mga purok, ang tanang mga tangkal sa baboy dili una pasudlan gawas sa mga taga OPV nga manghimo sa mga testing.
Ang mga kabalayan diin nagpositibo ang sakit sa baboy, magbutang og footmats nga may pamatay- kagaw sulod sa 15 ka adlaw, ang mga mananap nga layaw dinhi, hiktan aron dili aksidente nga makadala sa kagaw pagawas.
Dauban usab kadtong mga salin nga lawog sa baboy, aron dili kini makapanakod.
Niini usab, gideklara na nga ASF Quarantine area ang nahibiling bahin sa Purok 3, Purok 6, Purok 1, Purok 2, Purok 4, Purok 5 ug Purok 7.
Dinhi, ang tanang mga baboy testingan sa Veterinary PCR ug patyon kadtong baboy nga nagpositibo. Dayon, tanang baboy nga nasuol sa 100 ka metros gikan sa nagpositibo, patyon samtang ang magnegatibo sa testing, mahimong ihawon ug kan-on dayon, kon dili man ipalubong.
Dili pa usab tugotan ang pagpasulod og mga bag-ong baboy dinhi sulod sa tulo ka buwan.
Sa laing bahin, natumbok nga anaa na sa gawas sa Quarantine Area ang tanang purok sa Bayongan, San Isidro, Poblacion, Sto Nino,
Bugang ug Cambangay Norte nga nakadikit sa San Vicente.
Dinhi, himoon ang disease surveillance ug pagkolekta sa mga blood samples, ug mosubay sa protocols kon may magpositibo dinhi.
Hingusgan usab sulod dinhi ang Information Education ug Communication nga mga kalihukan.
Surveillance Areas usab ang tanang nahibilin nga purok sa Bayongan, San Isidro, Poblacion, Santo Nino, Bugang ug Cambangay Norte lakip na ang tanan nga barangays sa San Miguel. (PIABohol)
