NAGPATAWAG si Gobernador Erico Aristotle “Aris” Aumentado og usa ka meeting, Nobyembre 19, didto sa PPDO Conference Room, Provincial Capitol, Tagbilaran City, alang sa mga ehekutibong lokal sa pito ka mga munisipalidad nga mao ang Alburquerque, Baclayon, Corella, Dauis, Loboc, Panglao, ug Sikatuna uban sa dakbayan sa Tagbilaran ug mga hingtungdang buhatan sa Kapitolyo nga may kalabutan sa proyekto nga gikan sa Philippine Water Supply and Sanitation Project (PWSSP), ang Bohol Bulk Water Supply and Sanitation Project.
Ang maong tigom, usa ka aksyon sa Gobernador, pagsiguro nga nagalihok ang proseso kabahin sa maong proyekto nga nagkantidad og P5.123 Bilyones alang sa pito ka munisipalidad ug usa ka dakbayan, pondo pinaagi sa World Bank.
Kahinumduman nga ang Probinsya sa Bohol, usa sa tulo ka lalawigan (Siargao, Jolo ug Bohol) nga giila isip tukma nga dapit alang sa mas lawm nga pagtuon ug teknikal nga panukiduki sa PWSSP, pagdiskubre og dugang tinubdan sa luwas nga tubig mainom, pagsiguro sa kalimpyuhon sa serbisyo ug pagpa-umento sa serbisyo sa mga “providers” niini.
Gipanguluhan sa Provincial Planning and Development Office (PPDO) pinaagi sa PPDO head Atty. John Titus J. Vistal, ang pagpahiluna sa tigom diin gitambungan kini sa mga nasudnong ahensya sama sa World Bank, Department of Public Works and Highways (DPWH) ug Department of Interior and Local Government (DILG) pinaagi sa Zoom.
Ang DPWH girepresentahan nila ni Mike Alpasan, Project Manager, samtang ang DILG, girepresentahan nila ni Fe Crisilla Banluta, Program Manager ug ang World Bank gidumala nila ni Midori Makino, Program Leader, Ma. Fiorella DR Fabella, Sr. Water Supply and Sanitation Specialist ug kanhi undersecretary sa Department of Tourism, Rolando Canizal, Consultant.
Upat ka mga importanteng gihisgutan kabahin sa Bohol Bulk Water Supply and Sanitation Project mao ang estado sa Letter of Intent (LOI)sa mga gihisgutang LGU, sa ilang tinguha pagpalit og bulk (bulto) water, ug ang tugbang (counterpart)sa LGU sa proyekto nga mao ang pagbaton og kaugalingon nga Right of Way (ROW) sa nahimutangan sa proyekto, uban ang ensaktong dapit nga butangan sa BBWSSP ug ang Sangguniang Bayan (SB) Resolutions nga nagdeklarar sa “no objection to the project”.
Nasayran sa maong meeting nga giila sa Bohol Water Supply and Sanitation Project nga ang Barangay Tigbao, sa Loboc mao ang tukma nga tinubdan sa tubig alang sa maong proyekto, ug ang Barangay Bugho, Cabadiangan, Camayaan, Cambance ug Taytay mao ang booster stations sa maong munisipalidad. Samtang ang Pre Treatment Facility sa proyekto didto ipahiluna sa Barangy Cambuac, Sikatuna.
Matud ni Fabella nga target sa tulo ka ahensya nga tigpatuman sa proyekto ang pagpa-aprobar sa kumpleto nga papel ug mga rekisito niini ngadto sa National Economic Development Authority (NEDA)sa buwan sa Disyembre ning tuig 2024.
Tumong sa maong proyekto nga pinaagi sa pagdumala sa DPWH isip lead implementing agency uban sa co-implementors niini nga mao ang DILG ug ang Kagamhanang Probinsyal, nga makakuha og bulto nga tubig ang Kagamhanang Probinsyal, ug iapod-apod kini ngadto sa pito ka munisipalidad ug usa ka dakbayan.
Gipadangat sa Gobernador ang pagpasalamat ngadto sa World Bank sa oportunidad nga makabaton ang Bohol sa maong proyekto. Apil nga gipasalamatan niini ang tanan nga nahimong kabahin sa pagpahiluna niini.
Ang pagbaton sa sakto nga suplay sa tubig usa sa mga importante nga bahin sa Strategic Change Roadmap sa kasamtangan nga administrasyon.
Kauban sa mga misanong nga mayor sa pagpatawag sa Gobernador mao sila si Mayor Juan Manuel Lim sa Corella, Mayor Raymond Jala sa Loboc, Mayor Justiniana Ellorimo sa Sikatuna, ug Mayor Roman Bullen gikan sa Dauis. (RTB)
