KAPIN sa tres milyones (P3,005,000) nga ayudang pinansyal, pondo gikan sa Kagamhanang Probinsyal, ang gihatod ni Gobernador Erico Aristotle “Aris” Aumentado ngadto sa lungsod sa Calape, Nobyembre 14.
Ayuda kini para sa kabarangayan nga miduso ngadto sa buhatan sa Gobernador og resolusyon alang sa priority project sa barangay.
Atol sa panagtapok sa mga Senior Citizens sa Calape Cultural and Sports Center, tulo ka barangay ang midawat sa tunga sa milyon matag usa, gikan kang Gobernador Aris Aumentado nga mao ang Barangay Catmonan, Kahayag ug Desamparados, abag para sa ilang mga proyektong pang-imprastraktura.
Ang Calape Local Government Unit nga gipanguluhan ni Mayor Julius Herrera, midawat sa ilang bahin sa abot sa quarry sulod sa tulo sa bulan, Oktubre hangtod Disyembre 2023, nga nagkantidad og P45,000, samtang ang Barangay Catmonan midawat usab sa susamang bahin sa quarry kantidad og P60,000.
Uban kang Aumentado si Mayor Julius Herrera, anak sa Mayor nga si Goldie Herrera, kanhi Mayor sa Dakbayan sa Tagbilaran John Geesnell “Baba” Yap, mga empleyado ug opisyales sa Munisipalidad ug mga opisyales sa Barangay.
Samtang dala sa Gobernador ang ayuda sa kabarangayan, tagsa-tagsa nga giduaw ni Aumentado ang barangay Banlasan paghatod sa P200,000 alang sa pagpasemento sa ilang kalsada, Barangay Sampoangon P200,000 pagpa-instalar sa ilang submersible pump, Barangay Binogawan P800,000 pagpa-instalar og solar lights ug ang Barangay Liboron P200,000 pagpatukod sa barangay og Community Learning Center for Children.
Matud sa Gobernador nga bisan sa kalayo sa mga dapit nga iyang giadtuan, aron lang masubay ang kabarangayan, apan seryoso kini sa maong tumong. Isip Gobernador, gisagop ni Aumentado ang kaakuhan nga gikinahanglang personal nga susihon ang kahimtang sa kabarangayan, aron mas haom ang mga serbisyo nga gipadangat ngadto sa katawhan subay sa strategic change agenda sa administrasyon. Tumong sa administrasyon nga maduaw ang 1,109 ka barangay sa tibuok Bohol.
Ang Barangay Sampoangon, mi-admitar nga si Aumentado lang ang bugtong Gobernador nga miduaw sa ilang barangay
Kauban sa Gobernador pagpamisita sa kabarangayan sa Calape sila si Board Member Lucille Lagunay, Mayor Herrera ug Goldie Herrera ug mga opisyales sa munisipalidad. (RTB)
