GIPANGUNAHAN nila ni Gobernador Aris Aumentado ug Bohol first lady ug 2nd district CongW. Van-van Aumentado ang pagbukas sa McDonald sa lungsod sa Ubay kaniadtong Nov. 14, 2024.
Nasayran nga ang McDonald Ubay gipadagan sa magtiayong Dr. Wilson Du ug Ms. Evelyn Du, nga mao usab ang nanag-iya sa DES Marketing nationwide ug Kew Hotel dinhi sa dakbayan sa Tagbilaran.
Subay niini, si CongW. Vanvan mipadangat sa iyang pagdayeg ug pahalipay sa magti-ayong Du, nga gidala ang McDonald sa lugar ingon man ang mga opisyales sa lungsod sa Ubay pinangulohan ni Mayor Costan Reyes.
Gipahibawo usab sa Kongresista nga sugod sa Nobyembre 30, 2024 abli na ang maong McDonald 24-oras nga haum sa mga byahidor gikan sa kasikbit nga probinsya.
Kahinumduman nga gisugdan ang pagtrabaho niini kaniadtong buwan sa Hunyo, ug natapos ang proyekto human sa unom ka mga buwan.
Gawas sa McDonald nga naila sa natad sa fast foods, nakatakda usab nga buksan sa dili pa matapos ang tuig 2024 ang Pure Gold Supermarket diin mapalit ang nagkadaiyang baligya sama sa pagkaon, housewares, toiletres, ug dry goods.
Una niini, ang administrasyon ni Gob. Aumentado bukas sa tanang mga mamumuhunan nga mobubo sa ilang negosyo dinhi sa lalawigan nga naila isip bugtong UNESCO Global Geopark destination sa nasud tungod sa talagsaun ug maanindot nga mga talan-awon. (RTB)
