BISAN sa sunodsunod nga pagkasakmit sa daghang supply sa ilegal nga drugas tungod sa subsob nga operasyon sa kapulisan sa Central Visayas sa 2024, mas ubos gihapon ang gidaghanon niini kon itandi sa 2023.
Mas daghan sila og mga operasyon ug nangasikop karong tuiga itandi sa 2023, apan minos ang gidaghanon sa illegal drugs nga nasakmit, nagpasabot, matod sa kapulisan, nga miminos ang supply.
Sa data nga gihatag ni Police Lieutenant Colonel Gerard Ace Pelare, tipamaba ni Police Brigadier General Anthony Aberin nga gikan sa Enero hangtod Oktubre 2024, kini nagpakita nga nakalusad sila og 5,449 ka anti-illegal drug operations nga niresulta sa pagkasikop sa 6,630 ka mga suspek ug pagkasakmit sa 110,707.03 ka gramos sa gituohang shabu.
Samtang sa miaging tuig sa susamang mga buwan, nakahimo ang PRO-7 og 4,731 ka anti-illegal drug operations nga niresulta sa pagkasikop sa 6,119 ka drug personalities apan dako ang supply sa ilegal nga drugas ang ilang nasakmit nga niabot ngadto sa 165,582 gramos sa gituohang shabu.
Kini nagpasabot nga labaw og 718 ang gidaghanon sa mga operasyon sa 2024 itandi sa miaging tuig.
Labaw usab og 511 ka mga durugista ang nasikop karong tuiga itandi sa 2023. Apan taliwa niini, minos og 54,875 gramos ang nasakmit sa 2024 itandi sa 2023.
Matod ni Pelare nga kon itandi ang duha ka datus, makita nga 8 porsyiento ang pagsaka sa dakop tungod sa subsob nga operations apan mabantayan nga miubos ang supply sa ilegal nga drugas ngadto sa 32 porsiyento kay gamay na lang ang maabot sa CV gikan sa kaulohan.
Apan wala sila mokompyansa tungod kay mamahimong mosaka ang supply sa ilegal nga drugas sa Central Visayas tungod sa nagkaduol na nga holiday season.
Tungod niini, mimando ang hepe sa kapulisan sa Central Visayas nga pahugtan pa ang ilang intelligence monitoring ug pabahaan og polis ang kadalanan lakip na ang pagpangita sa mga nalambigit sa ilegal nga drugas aron mapugngan ang pagkuyanap niini. (RTB)
