HUGOT nga gibantayan ang East Bohol Fault, usa sa upat ka fault lines sa probinsiya nunot sa sunodsunod nga 27 ka mild tremors sa tulo ka mga lungsod sa miaging duha ka buwan.
Kini nga fault line’s projected energy release makahimog Magnitude 7 nga linog, sumala ni Nolan Evangelista, Science Research Analyst kinsa gitudlo isip officer-in-charge sa Philippine Institute of Volcanology and Seismology (PHIVOLCS) office dinhi.
Ang gipakusog nga monitoring nisunod human sa 27 ka pagtay-og walay labot ang bag-ohay lang nga lima ka linog sa Loay area.
Adunay 12 ka seismic nga panghitabo sa lungsod sa Anda, 11 sa Loay-Lila area ug upat sa Sierra Bullones.
Gawas sa East Bohol Fault, aduna pay laing tulo ka fault lines sa probinsiya nga mao ang North Bohol Fault, South Offshore Fault ug ang Maribojoc Fault.
Sa upat ka fault lines, ang East Bohol Fault nagbutang sa probinsya sa usa ka “kritikal nga pagbantay” tungod kay kini nga fault wala nakatala sa dagkong mga lihok sa miaging 100 ka tuig. Kini nga linya gikan sa Loay hangtod sa Sierra Bullones.
Ang opisyal sa Phivolcs niingon nga kung kini nga faultline makahimo sa usa ka dakong kalihukan, ang pagtay-og mabati sa mga coastal areas gikan sa Tagbilaran ngadto sa Valencia ug sa interyor nga mga lungsod sa Sevilla, Loboc ingon man sa mga lungsod sa Corella ug Cortes.
Kahinumdoman nga ang labing kusog nga linog nga miigo sa probinsiya anaa lang sa intensity 7.2 niadtong Oktubre 15, 2013, mga 11 ka tuig na ang milabay diin ang gigikanan sa pagtay-og nasubay sa North Bohol Fault diin ang fault line gikan sa lungsod sa Inabanga hangtod sa Oslob, Cebu.
Ang linog nga nabati sa Loay nasubay nga gikan sa East Bohol Fault ug South Offshore Fault samtang ang sa lungsod sa Mabini gikan sa South Offshore Fault.
Ang hinay kaayo nga pagtay-og sa Pilar ug Sierra Bullones nasubay nga gikan sa tumoy sa ikog sa North Bohol Fault.
Matud sa Phivolcs nga ang Maribojoc Fault anaa sa tiilan sa bukid sa Maribojoc samtang naobserbahan nga mas mubo nga fault.
Ang paglihok sa East Bohol Fault nabutang sa usa ka “high risk possibility” nga gikonsiderar nga kini nga fault line wala makatala ug kusog nga pagtay-og sa miaging 100 ka tuig.
Sa laing bahin, ang labing kusog nga linog nga miigo sa Bohol mao ang 7.2 nga linog niadtong 2013 nga nagbilin og dili mominos sa 200 ka mga tawo nga namatay samtang 350,000 ka mga tawo ang namakwit ug mga 50,000 ka balay ang naguba.
Kadaghanan sa mga epicenter sa linog nga nahitabi sa Bohol adunay kalabotan sa silangan nga subduction sa Philippine Sea plate.
Ang Bohol naigo sa 6.8 nga linog niadtong 1990 diin ang Anda maoy sentro niini ug laing niadtong 1996 sa magnitude 5.6. (RTB)
