DUL-AN sa P7 milyunes nga balor sa shabu ang nasakmit sa buy-bust sa Purok 6, Barangay Manga, Dakbayan sa Tagbilaran, alas 10:30 sa gabii, Domingo, Oktubre 27, 2024.
Ang nasikop giila nga si Mario Aranzado, 44, taga Purok 2, Barangay Bayacabac, lungsod sa Maribojoc, Lalawigan sa Bohol.
Nakuha sa mga operatiba ang binulto nga gituohang shabu nga motimbang sa 1,020 gramos nga dunay standard drug price nga P6,936,000 ug usa ka .38 nga kalibre sa pistola.
Sumala sa taho sa kapulisan, nadakpan na kini kaniadto human nalambigit sa samang kalapasan ug nasikop pagbalik sa mga sakop sa Provincial Intelligence Unit (PIU) sa Bohol Police Provincial Office (BPPO).
Matod ni Police Lieutenant Colonel Joemar Pomarejos, hepe sa PIU sa BPPO, si Aranzado nadakpan na niadtong 2015 drugas apan naabswelto sa iyang kaso.
Human kini makagawas sa bilanggoan, nagpadayon sa iyang naandan nga trabaho nga mao ang pagpamaligyag ilegal nga drugas gani siya ang gitudlo nga tinubdan sa 50 gramos nga nasakmit sa PIU sa Purok 3, Barangay Bayabas, lungsod sa Maribojoc diin nadakpan si Ibrahim Ilano, 42, taga Barangay Poblacion sa maong lungsod.
Unang nadakpan si Ibrahim sa mga sakop sa PIU alas 4:25 sa hapon, Dominggo, Oktubre 27, 2024.
Gibutyag sa suspek kung kinsa ang nagsuplay niya sa ilegal nga drugas nga mao si Aranzado nga maoy gi-follow up sa kapulisan.
Base sa nakuha nga impormasyon ni Pomarejos nga makabaligya si Aranzado og 1 ngadto sa 2 ka kilo sa shabu matag semana.
Ang iyang area of distribution mao ang Tagbilaran ug mga silingang lungsod lakip na niini ang lungsod sa Maribojoc.
Dunay gipangtug-an ang suspek kinsa ang mosuplay niya sa ilegal nga drugas nga gipaubos pa sa case build-up sa kapulisan. (RTB)
