NAKAKAPLAG ang Office of the Ombudsman for the Visayas og posibleng hinungdan sa pagpadayon sa imbestigasyon batok nila ni Mayor Don Ritchie P. Buates sa lungsod sa Albur, laing tulo ka mga empleyado sa buhatan sa DENR Tagbilaran, ug sa tag-iya sa Vic-Tour’s Recreational Hub subay sa operasyon sa Vic-Tour’s whale watching nga nag-operate sulod sa Alburquerque-Loboc-Loay Protected Landscape and Seascape (ALLPLS) sa Barangay Sta. Felomina, lungsod sa Alburquerque.
Nasayran nga ang maong tourism destination ang gidumala sa usa ka pribadong kompanya bisan kon ang lugar gipanag-iya sa kagamhanan ug gidid-an ang si bisan kinsa nga makadevelop sa lugar.
Ang lugar sa negosyo giingong usa ka Marine Protected Area (MPA) diin gidid-an basi sa balaod sa DENR ang si bisan kinsa nga makapamutol sa bisan unsa nga kahoy (bakhaw) ug pagpasemento sa bisan asang parte sa dapit.
Nasayran usab nga walay resolusyon gikan sa Sangguniang Bayan (SB) sa lungsod sa Alburquerque nga nagtugot kang Buates nga makig-kumbuya ang LGU sa usa ka pribadong kompanya alang sa maong negosyo sa turismo.
Kahinumduman nga una nang gipatawag sa Sangguniang Panlalawigan si Mayor Buates ug mga kaubanan sa nakalabay nga mga buwan human makadawat ang Committee on Environment sa reklamo sa pribadong mga tawo sa lungsod kalabot sa operasyon sa Vic-Tours RH. Atol sa hearing sa SP, gipadayag ni Buates nga wala siyay nabuhat nga kalapasan kay adunay napasar nga balaod ang lungsod alang niini ug nakatabang kini sa mga mananagat sa lugar sa ilang matag adlaw nga panginabuhian.
“Finding enough basis to proceed with the preliminary investigation and administrative adjudication proceedings of these criminal and administrative cases”.
Gihatagan og napo (10) ka adlaw pagsumiter sa ilang counter affidavits silang Albur Mayor Don Ritchie Buates, ug tulo ka DENR employees nga sila si Ariel N. Rica, Jose Cleo Cary F. Colis, Benigno G. Gamayot nga dunay office address sa New Capitol Heights, Tagbilaran City ug ang pribadong tawo nga nanag-iya sa Vic-Tour’s WW.
“Motion to dismiss or bill of particulars, and dilatory motions including but not limited to, motions for extension of time, second motions for re-consideration and or re-investigation are prohibited pleadings, and shall be stricken off the records of the case”.
Ubos ang kasong administratiba sa OMB-V-A-AUG-24-0153 diin ang mga private complainants mao sila si Dr. Cerilo Jalad, ug Teresita Maghanoy nga mireklamo tungod sa dishonesty, grave misconduct, ug gross neglect of duty nga kalapasan ubos sa Republic Act 6713 (Code of Conduct and Ethical Standards for Public Officials and Employees).
Samtang ang kasong criminal ubos sa OMB-V-C-AUG-24-0134 tungod sa kalapasan sa mga gikiha sa Art. 220 (illegal use of public funds or property), RPC/Sect. 3 (e), RA 3019 (Anti-Graft and Corrupt Practices Act), as amended RA 7160 (LGC of 1991)/ Other Criminal Offenses. Nadugang isip gikiha niining maong kaso ang usa ka Victorino Velasco Garay, Pribadong tawo, tag-iya sa Vic-Tour’s Recreational Hub nga maoy tag-iya sa gireklamong negosyo sa lugar nga usa ka Marine Protected Area (MPA).
Hangtud sa pagsuwat ning balita, wala pay gipagawas nga pamahayag ang kampo ni Mayor Buates human mugawas ang joint order sa Ombudsman kaniadtong Agosto 28, 2024 ubos ni Dante F. Vargas, Deputy Ombudsman for the Visayas nga gipirmahan ni Euphemia B. Bacalso, ang Director, Preliminary Investigation, Administrative Adjudication and Prosecution Bureau-A (PIAAPB-A).
Kahinumduman nga nahimugso ang maong reklamo sa lungsod sa Alburquerque human usab sa kontrobersiya sa Captains Peak sa lungsod sa Sagbayan diin gika-suspenso sa 68-ka mga tawo sa Bohol nga naglakip na nila ni Gob. Aris Aumentado, mga mayores ug uban pang indibidwal. Apan human sa duha ka buwan nahibalik sa katungdanan si Aumentado ug ubang mga mayores gawas lang sa mayor sa lunsgod sa Carmen ug Sagbayan. (RTB)
