MIKABAT sa 1,267 ka mga pamilya ang nahatagan sa lima ka kilong bugas ug mga de lata nga giapod-apod sa Kagamhanang Probinsyal ubos sa liderato ni Gobernador Erico Aristotle “Aris” Aumentado, pinaagi sa Office of the Provincial Social Welfare and Development (OPSWD) alang sa lima ka barangay sa Batuan, atol sa gipahigayon nga Abante Barangay Service Caravan, Septyembre 19 didto sa Rosariohan Elementary School, Rosariohan, Batuan.
Naghiusa ang mga kapitanes sa lima ka barangay nga sila si Kapitan Raul Tiongson sa Barangay Rosariohan ang hingtungdang barangay, uban kanila ni Kapitan Rolando Pataca sa Barangay Rizal, Kapitana Ma. Fe Jala sa Barangay Janlud, Kapitan Nilo Macabudbud sa Barangay Cambacay, ug Kapitan Julius Pancho sa Barangay Aloja, aron sa pagdawat sa mga benepisyo ug serbisyo pinaagi sa Administrasyong Abante Bohol.
Sa serbisyong dental, 60 ka mga indibidwal ang nakapaibot sa ngipon pinaagi sa pagpahigayon sa Provincial Health Office sa pagkigtambayayong sa Municipal Health Office.
Usa ka gatus kapin ang nakapahiling sa ilang panlawas ug nahatagan sa libreng tambal sa Medical Outreach Unit (MOU).
Napulo ka mga bata ang natuli sa PHO pinaagi sa medical team sa lungsod sa President Carlos P. Garcia.
Adunay 128 ka mga magtutungha sa Rosariohan, Batuan, ang nakadawat og school supplies gikan sa Education Development Center (EDC).
Mipadangat usab sa nagkadaiyang serbisyo ang uban nga buhatan sama sa LGA, PCDO, OPV, OPA, PGSO uban sa 47TH IB, PTF-ELCAC, PNP-Batuan ug Register of Deeds-Tagbilaran.
Gipadayag ni Mayor Antonino Jumawid ang kalipay sa gipahigayon nga Abante Caravan diha sa iyang munisipalidad.
Si Gobernador Aris sa iyang bahin, mipadayag usab nga usa sa rason sa iyang pagkugi sa pagpahiluna og mga Abante Caravan sa mga suok nga bahin sa lalawigan aron sa pagpamatuod sa seryoso nga pagserbisyo sa iyang administrasyon.
Matud ni Aumentado nga andam siya sa pagpaminaw ug pagtabang sa kung aduna pa’y nagpabilin sa walhong grupo, pagbaton og bag-ong kinabuhi.
Gipasalamatan sa Gobernador ang tanan nga nahimong kabahin sa kalihukan, ug sa aktibo nga partisipasyon sa LGU Batuan diha sa Caravan, pinanguluhan ni Mayor Antonino Jumawid uban sa mga opisyales sa barangay
Ang Abante Barangay Serbisyo Caravan kabahin sa inisyatibo sa Gobernador pagmintinar sa kahapsay ug kalinaw sa pangagamhanan. (RTB)
