CORTES, Bohol (PIA) – Gilibkas na sa PAG-ASA ang tanan nga tropical Cyclone Weather Signal nga giisa sa nagkadaiyang parte sa nasud, dili pa gihapon angay mokompyansa.
Kini kay sa kalapadon sa bagyo nga 850 kilometros gikan sa sentro niini, ang baga nga panganod nga magdalag uwan ug ang naguyod nga Habagat, magpakutaw pa gihapon sa mga kadagatan sa nasud.
Ang naguyod nga Habagat magdala og mga unos ug kusog nga huros sa hangin ilabi na sa mga baybayon ug mga buntaog nga lugar.
Kusog pa Ang epekto sa Habagat karon sa Batangas, MIMAROPA, Bicol Region, Visayas, Caraga Region, Northern Mindanao, Zamboanga Peninsula, BARMM, ug Davao Region.
Dinhing dapita mapaabut Ang kasarangan ngadto sa kusog ug dagko nga mga bawod sa kabaybayonan mga moabut sa 1.5 ngadto sa 4.0 m ilabi na sa mga kadagatan sa kasadpan sa Palawan ug Occidental Mindoro.
Moabut usab sa 1.5 ngadto sa 3.5 m: Ang kadagkoon sa bawod sa kasadpang kadagatan sa Western Visayas, kadagatan sa kasadpan ug timog sa Negros Island Region, kadagatan sa timog sa Central Visayas, kadagatan sa timog Eastern Visayas, kadagatan sa Caraga Region, kadagatan sa Northern Mindanao, kadagatan sa amihanan ug kasadpan sa Zamboanga Peninsula, kadagatan sa kasubangan sa Davao Region, ug sa mga kadagatan sa Palawan.
1.0 metros ngadto sa 3.0 m Ang posibleng bawod sa kasubangang kadagatan sa Eastern Visayas ug 1.0 metros ngadto sa 2.5 m Ang kadagkoon sa bawod sa amihanang kadagatan sa Ilocos Region, Cagayan Valley, kadagatan sa timog sa Quezon, kadagatan sa Bicol Region, ug MIMAROPA, Visayas, Davao Region, ug Zamboanga Peninsula.
Niini, gipahimangnoan sa Philippine Coast Guard ang mga byahedor nga moluwan sa gagmay nga mga sakayan sa dagat, tanang matang.sa motorbancas nga dili una mosungasong palawod samtang nagpabilin pa kining kahimtang, ilabi na gyud kon walay igong kasinatian Ang Kapitan ug wala sa saktong kondisyon ug dili hitsas ang sakayan. (PIABohol)
