MIDEKLARAR si Gobernador Erico Aristotle Aumentado og dengue outbreak sa Bohol ug mimando sa pagtudlo og task force nga manguna sa pakigbatok sa nagdagsang nga epidemya.
Kini human nisaka ang kaso sa dengue sa Bohol base sa cumulative data karong tuiga, diin girekomendar sa Provincial Anti-Dengue Task Force (PADTF) ang pagpahayag pinaagi sa resolusyon niadtong Agosto 29.
Ang Executive Order 34 giluwatan nunot sa tigom sa PADTF Septiyembre 2, 2024, sa Kapitolyo, nga nagbutyag nga adunay 5,834 ka kaso sa dengue ang natala gikan sa Enero hangtod Agosto 24, diin 14 na ang namatay.
Ang kasamtangang rekord kay 451.4% nga mas taas kon itandi sa samang panahon sa miaging tuig, nga adunay 971 lamang ka kaso, busa milabaw sa epidemiological threshold sumala sa gitaho sa Provincial Epidemiological Surveillance Unit (PESU).
Ang epidemic threshold mao ang lebel diin ang gidaghanon sa mga kaso sa dengue milapas sa kasagaran nga gidaghanon gikan sa miaging lima ka tuig, nga nagtimaan sa pagsugod sa usa ka epidemya sa Bohol.
2 ka lungsod sa probinsya ang kwalipikado na nga magdeklara sa outbreak, samtang daghang lungsod ang posibleng mag outbreak.
Ang mga lungsod nga labaw sa epidemic threshold sa morbidity week 34 mao ang Anda, Alicia, Baclayon, Balilihan, Candijay, Dauis, Garcia Hernandez, Getafe, Inabanga, Mabini, Maribojoc, San Isidro, Sikatuna, Tagbilaran City, Talibon, Trinidad, ug Tubigon.
Ang datos gipaluyohan usab sa taho sa Regional Epidemiological Surveillance Unit (RESU) uban sa hiniusang datos sa Bohol, diin ang epidemiological threshold milapas na sa miaging 6 ka semana sa morbidity.
Naglangkob kini sa 8 nga namatay nga natala kaniadtong Agosto lamang: 3 sa Tagbilaran City, 2 sa Inabanga, ug 1 matag usa sa Anda, Getafe, ug Ubay.
Aron sa dugang paghatag ug accessible nga serbisyo sa panglawas, nga nahiuyon sa Strategic Change Agenda sa Kapitolyo, ang Panggamhanan sa Probinsiya mipalit ug 5.3 milyones ka pesos nga kantidad sa IV fluids ug testing kits, ilabi na alang sa dengue outbreak, uban ang dugang mga higdaanan aron mapuno ang mga ospital nga gipanag-iya sa probinsiya sa Bohol.
Ang gipamalit nga mga suplay naapod-apod na ug magamit, ingon sa gikumpirma sa mga hepe sa district hospital sa Talibon ug Carmen.
Sa laing bahin, gipirmahan ni Aumentado ang Executive Order 33 nga pinetsahan og Agosto 29, nga nagtumong sa komposisyon sa Bohol Provincial Disaster Risk Reduction and Management in Health (DRRMH).
Kini gilangkuban ni Provincial Health Officer I Dr. Cesar Tomas Lopez isip Chairman; Si DILG-Bohol Provincial Director, Dir. Jerome Gonzales isip Co-Chairman; ug mga sakop sa task force nga naglakip sa PDOHO Team Leader Dr. Van Phillip Baton, AMHOP-Bohol President Dr. Dennis Lua, DEDMH Medical Center Chief Dr. Nelson Elle, GCGMMC Medical Officer Dr. Jhoanna Rae Cadiz, ug PDOHO RESU, Mr. Cliff Michael Gubat.
Ang PADTF Secretariat gimugna usab aron sa pagpatuman sa substantibo ug administratibong suporta sa task force, nga naglakip nila Artemia Lison, Leonidas Saniel, ug Fritzie Olaguir, tanan gikan sa Provincial Health Office.
Sa deklarasyon sa dengue outbreak, ang mga local government units gipaabot nga mopatuman og mga lakang, lakip na ang enhanced 4S strategy, reactivation sa ilang local task force ug Aksyon Barangay Kontra Dengue, ug pakig-alayon sa nagkalain-laing stakeholders, ilabina sa communication ug awareness strategies.
Ubang gipaabot nga mga lakang mao ang pagpangita ug pagguba sa mga lugar nga breeding sa lamok, dengue fast lanes sa mga health units ug ospital, tukma nga referral sa mga pasyente, alokasyon sa pondo alang sa mga suplay alang sa paglikay sa dengue, ug pagtukod sa usa ka local operations center. (RTB)
