NANAWAGAN si Gob. Aris Aumentado sa kooperasyon sa pagwagtang sa dengue ug ang lalawigan sa Bohol padayon nga nagpauswag sa mga serbisyo ug pasilidad sa ospital aron mapalapad ang serbisyo sa kahimsog.
Gipasiugda kini ni Aumentado sa iyang ikaduha nga State of the Province Address niadtong Agosto 30, 2024 sa Bohol Cultural Center human siya milingkod sa katungdanan niadtong udto sa Hulyo 30, 2022.
Siya nitaho nga ang Garcia Memorial Provincial Hospital sa lungsod sa Talibon gi-upgrade na sa Level II/ samtang ang Francisco Dagohoy Memorial Hospital sa lungsod sa Clarin ang Level I na nga pasilidad.
Samtang, ang Congressman Natalio Castillo Memorial Hospital sa Loon gibalhin na sa bag-o ug gipaayo nga pasilidad.
Kini nga mga kalamboan nagsiguro nga mas episyente, komportable nga pag-atiman sa panglawas, dugang niya.
Namatikdan usab sa gobernador ang 97% nga pagsaka sa bed occupancy rate sa mga hospital nga gidumala sa probinsiya, diin matud niya nagpakita sa pagsalig nga gihatag sa mga Bol-anon ngadto sa mga tambalanan.
Samtang gihimo ang padayon nga pag-ayo, si Aumentado nanawagan sa mga opisyal sa barangay ug mga health worker nga tubagon ang 315% nga pagtaas sa mga kaso sa dengue.
Kini, matod niya, taliwala sa mga deklarasyon sa dengue outbreaks sa ubang mga probinsiya.
“Dili nato tugotan ang samang butang nga mahitabo sa Bohol. Magtinabangay kita aron mawagtang ang dengue sa atong mga komunidad,” matud ni Aumentado.
Ang kagamhanang probinsiyal pinaagi sa Provincial Health Office nihimo og emerhensya nga pagpalit og P5.3 milyones nga kantidad sa IV fluids ug dengue testing kits, diin ibutang kini sa 10 ka mga tambalanan nga gipanag-iya sa Probinsiya. Gipalit usab ang ikaduhang batch sa IV fluids ug NSI testing kits nga nagkantidad og P9 milyones.
Aron masiguro nga ang mga nag-unang serbisyo sa pag-atiman sa kahimsog, ang Abante Service Caravan kanunay nga gihimo, naghatag usa ka halapad nga serbisyo, gikan sa dental ug medikal nga konsultasyon, Operation Tuli, pagsusi sa mata, pag-apod-apod sa tambal, mga legal clinic, ug uban pang importanteng serbisyo sa mga barangay.
Dungan niini, mikabat sa kinatibuk-ang P241 milyones nga hinabang pinansyal ang naapod-apod sa mga lungsod ug barangay sa tibuok Bohol, ug P468,000,000 ang nahatag sa 49,000 ka benepisyaryo sa hinabang sa pabalay.
Sa social welfare assistance, P74 milyones ang gipagawas sa Office of the Provincial Social Welfare and Development (OPSWD) uban sa laing P3.1 bilyones gikan sa DSWD.
Naghatag usab ang OPSWD og food packs ug psychological first aid sa mga pamilya nga anaa sa kalisod ug sa mga apektado sa armadong panagbangi.
Aron suportahan ang komunidad sa mga Muslim, gihatagan sila og gitukoran sa Muslim Public Cemetery sa Bilar dugang sa pasalig nga mapreserbar ang kultural nga kabilin sa Boholano pinaagi sa Executive Order No. 23, Series of 2024, pinasubay sa Provincial Ordinance No. ni Board Member Elpidio Bonita, aron magtukod ug advisory committee alang sa pag-andam sa Eskaya Indigenous People Development Master Plan.
Daghang serbisyo sa panglawas ang umaabot, sama sa pagkompleto sa Central Philippines Specialty Center sa Cortes ug pagtukod sa mga Super Health Centers, sa pakigtambayayong sa Department of Health nga maghatag ug gikinahanglang serbisyo sa pag-atiman sa panglawas.
Dugang pa ni Aumentado, ang probinsiya nakadawat og mobile clinic gikan ni First Lady Liza Araneta-Marcos nga adunay modernong diagnostic equipment, lakip na ang mobile digital X-ray machine, ug ultrasound machine, nga gitumong sa pagpaduol sa serbisyo sa panglawas ngadto sa mga Bol-anon.
Sa kataposan, ang Bohol gikatakdang makadawat ug duolan sa P1.2 Bilyones sa health infrastructure, pasilidad, ug mga sakyanan ubos sa World Bank-funded Health System Resiliency Program.
Gihatagan og gibug-aton ni Aumentado nga walay hunong ang Panggamhanan sa Probinsiya sa mga serbisyo niini ngadto sa mga Boholano dili lamang sa serbisyo sa panglawas ug katilingban kon dili lakip na sa kinatibuk-ang estratehikong dalan sa pagdumala alang sa pagtubo ug kalamboan sa lalawigan.
Subay sa paghatod sa ikaduhang State of the Province Address ni Gob. Aumentado, wala usab niini malimti ang iyang higala ug katambayayong sa pagserbisyo si bise-gobernador Dionisio Victor Balite.
Sigon ni Aumentado nga dili niya mahimo ang tanan kung wala ang tabang ug pag suporta sa iyang administrasyon sa mitaliwan nga si Balite.
“You left us with a legacy to Go Beyond, you will always be here in our hearts VG Balite,” sumala pa sa gobernador. (RTB)
