GIANUNSIYO na sa Department of Social Welfare and Development Field Office 7 (DSWD-7) ang mga nag-unang probinsyal nga mananaog sa Search for Huwarang Pantawid Pamilya 2024 gikan sa Bohol, Cebu, Negros Oriental, ug Siquijor.
Ang first placer nga mananaog sa Bohol mao ang Doblas family nga taga Batuan; samtang sa Cebu mao ang Icot family sa lungsod sa Liloan; sa Negros Oriental ang Fortuito family nga taga Sibulan ug sa Siquijor mao ang Encina family nga gikan sa lungsod sa Lazi.
Nagkanayon si DSWD-7 Regional Director Shalaine Marie Lucero nga kini nga mga pamilya nagpakita sa lig-on nga relasyon sa pamilya, sa positibo nga mga mithi sa Pilipino, ug nakatampo og panahon ug paningkamot sa ilang komunidad.
Matud usab niya nga ang ilang mga istorya sa kinabuhi makapadasig ug angay nga sundon sa ubang mga pamilya nga benepisyaryo sa 4Ps, ilabi na sa pagsuporta sa ilang mga anak sa pagpadayon sa ilang edukasyon.
Pinaagi sa pagpangita sa Huwarang Pantawid Pamilya mapamatud-an nila nga sayop ang pagtuo nga ang mga benepisyaryo sa 4Ps nagsalig ra sa tabang sa gobyerno ug mapasiugda nila ang bili sa determinasyon ug panaghiusa sulod sa pamilya aron makab-ot ang ilang mga pangandoy.
Ang mga mananaog makadawat og cash incentives ug certificates of recognition gikan sa DSWD ug mahimong mga ambassador sa ilang tagsatagsa ka komunidad. (RTB)
