GILUSAD kagahapon ang bag-ong kahugpungan nga mao ang 1-BOHOL Movement sa tuyo ug tumong nga mahiusa gihapon ang mga lideres sa politika sa mitaliwan nga si bise-gobernador Dionisio Victor A. Balite.
Nasayran ning pamantalaan nga dul-an sa 60-ka mga pangulo sa kalungsuran ug gikan sa syudad sa Tagbilaran sa gitawag kaniadto nga BALITE-DO ang miabin sa bag-ong kapunungan.
Gihimo ang paglusad sa 1-Bohol Movement sa usa ka lugar ning syudad diin ang umaabot nga Bokal sa ikatulong distrito DJ Balite, ang anak sa mitaliwan nga opsiyal sa Bohol maoy mihatag sa pagpasabot kalabot sa katuyuan sa organisasyon.
Kagahapon usab mao ang pagsugod sa siyam ka gabie nga pangadje alang sa umaabot nga ika-40 diyas sa kanhi bise-gobernador karong Agosto 25, 2024.
Subay niini, ang kanhi bise-gobernador sa Bohol manlalaban Dioning Balite mihatag usab sa iyang pagpasabot sa upat ka mga agenda sa maong peoples’ organization nga nagdala sa acroname nga GATE.
Sigon ni Balite nga nag-una niini mao ang pagpromote sa maayong pagdumala sa kagamhanan(Good Governance), pagpalambo sa natad sa agrikultura ug ekonomiya(Agricultural & Economic Dev’t.), pagpalambo sa edukasyong teknikal ug kaugalingong kahanas(Technical Education & Skills Dev’t.), ug katapusan mao ang paghatag sa libre nga edukasyon(Education for All).
Mihatag usab sa dugang pagpasabot alang sa livelihood program ug hisgutanang legal alang sa grupo ang consultant sa kanhi bise-gobernador nga si Engr. Vicente Inting Loquellano, ug ang masamong sa mga Balite nga si Atty. Glenn Rey D. Anino nga kanhi Chief of Staff sa buhatan sa mitaliwang opisyal.
Atol sa paglusad gipili usab ang bag-ong mga opisyales sa 1-Bohol Movement nga mao sila si Mr. Urso Cajilog (Valencia) isip presidente; Engr. Inting Loquellano (Tagbilaran) isip bise-presidente; tulo ka executive VP alang sa tulo ka distrito (Mr. Jojo Tapang – Ubay alang sa 2nd dist., Capt. Neil Oculam – Loboc alang sa 3rd dist.) nga dunay tag-upat ka komitiba alang sa women, seniors, youth ug LGBTQI+; Atty. Glenn Anino (Sevilla) isip kalihim ug legal consultant; Mr. Longlong Ancog (Corella) isip mamahandi; Mr. Roger Balamad (Catigbian) isip awditor; Mr. Dodong Pitao (Dauis) isip PRO; ug Atty. Dioning Balite (Tagbilaran/Valencia) isip adviser/financier sa grupo.
Bugtong mayor nga miapil sa paglusad sa bag-ong grupo mao si Valencia Mayor Dionisio Niel A. Balite, igsoon sa kanhi bise-gobernador.
Manumpa sa ilang katungdanan ang bag-ong mga napili nga opisyal sa 1-Bohol Movement atubangan ni Sen. Bong Go sa umaabot nga ikaduhang semana sa Sityembre dungan sa pagbukas sa ika-22 na nga Bohol Schools Athletics Ass. Meet (BSAA). (RTB)
