GIBUNGKAG sa mga sakop sa Philippine Drug Enforcement Agency (PDEA) ang usa ka drug den sa Barangay Cogon, dakbayan sa Tagbilaran, Bohol Police Provincial Office (BPPO) inabagan sa Bohol Maritime Police sa nakalabay nga Agusto 12.
Ang pagronda niresulta sa pagkasikop sa tulo ka mga tawo, si Lyndon Oronan, 35, maoy subject sa operation nga drug den maintainer samtang ang iyang ig-agaw nga mao sab ang kauban sa pagdumala sa drug den nga si Jason Oronan, 38, usa ka pintor.
Lakip sa nadakpan ang kustomer nga naatlan sa sulod sa drug den nga giila nga si Ronnel Marquez, 19, usa ka laborer.
Nasakmit sa mga operatiba ang lima ka pakete nga adunay sud nga gituohang shabu nga motimbang sa 15 gramos nga adunay estimated average market value nga P102,000, nakuha sab ang kuwarta nga gigamit isip buy bust money ug usa ka mobile phone lakip na ang mga drug paraphernalia.
Matod ni Leia Alcantara information officer sa PDEA-7 nga duha ka semana nila nga gipaubos sa case buildup ang ilang target nga si Lyndon human madawat ang kasayuran gikan sa usa ka kasaligang tinubdan.
Sa ilang nakuha nga inpormasyon makabaligya ang suspetsado og 10-15 gramos matag semana.
Si Lyndon Oronan nadakpan na niadtong 2017 apan na dismiss ang iyang kaso sa korte apan sa iyang pagawas mibalik na usab ni sa iyang naandan nga bisyo.
Kasong pagpayuhot sa ilegal nga drugas ug pagpadagan sa usa ka drug den maoy atubangon niini. (RTB)
