EMOSYONAL nga nagpasalamat si Gobernador Aris Aumentado sa mitaliwan nga si kanhi bise-gobernador Dionisio Victor Balite.
Sumala ni Aumentado atol sa senemana nga ‘The Governor’s Report’ niadtong Biyernes, Agosto 9, si Balite usa ka talagsaon nga lider kinsa adunay malumo ug maloloy-on nga kasing-kasing sa pagpangalagad.
Si Balite milingkod sulod sa duha ka mga buwan isip pinakataas nga opisyal sa Bohol human si Aumentado gipahamtangan sa unom ka buwan nga suspensiyon sa Ombudsman tungod sa kontrobersiya sa Captain’s Peak Resort sa lungsod sa Sagbayan sugod niadtong katapusang semana sa Mayo niining tuiga.
Apan Hulyo 31, 2024 gilibkas sa Ombbudsman ang suspensiyon ni Aumentado kauban ang laing 30-ka mga opisyal sa kalungsuran hinungdan nga nakabalik kini sa katungdanan.
Nakahilak si Aumentado tungod kay iyang nabati ang kalisud ni Balite sa pag-alagad tungod kay naghambin man kini sa balatian.
Namatay si VG Balite Hulyo 17, 2024 nga bisan anaa na kini sa katapusang yugto sa iyang kinabuhi, apan namirma pa kini sa mga dokumento isip acting-governor sulod sa ICU sa Ace Hospital.
Duha ka semana human siya mitaliwan nakabalik si Aumentado sa Kapitolyo diin miingon kini nga sa pagsugod sa buwan sa Hulyo nagsige ug tawag ug text si Balite nga gusto na niining mubalik ang nahauna kay gipaoy na siya.
Dugang ni Aumentado nga abi niya kon nagpasiaw lang ang kanhi bise-gobernador, apan sa kaulahian kalit lang kini nga mitaliwan.
Gihulagway usab ni Aumentado si Balite nga usa ka kugihan, dedikado, ug mapinanggaon nga lider alang sa mga Bol-anon. (RTB)
