GISUSPENSO ang pagpatuman sa P1.2 bilyones nga flood control project sa Loboc River sa lungsod sa Loboc tungod sa kapakyas pagkuha og Environmental Compliance Certificate (ECC), matud pa sa usa ka opisyal sa Department of Public Works and Highways (DPWH).
Gipahamtang ang suspension taliwala sa pagpahugot sa environmental protection measures sa probinsiya human nahimong talan-awon sa tibuok nasud ang operasyon sa Captain’s Peak resort sa sikat nga Chocolate Hills tungod sa giingong paglapas sa environmental laws.
Matod ni Maguiting Cruz, hepe sa Third Engineering District sa DPWH, hingpit nga nahunong ang konstruksyon sugod niadtong miaging buwan.
Ang Loboc River kay usa ka protected area ubos sa Loboc Watershed Forest Reserve.
“Kinahanglan gyud nga makuha una ang ECC kay wala nay agas ang proyekto. Kay mao man ni ang problema sa Chocolate Hills kay naghugot ang DENR,” matod ni Cruz.
Molanat og mga duha ka buwan aron ma-issue ang ECC. Hinuon, giklaro ni Cruz nga mi-apply na sila og ECC bisan sa wala pa magsugod ang pagtukod sa riprap walls nga kabahin sa proyekto.
“Medyo hinay ang proseso kay medyo gisusi karon ang DENR tungod sa nahitabo sa Chocolate Hills, partikular sa Captain’s Peak pero dili lang kini isyu sa Bohol, nationwide pa,” dugang niya.
Matud ni Cruz nga ila nang nasumiter ang kadaghanan sa mga rekisitos nga gipahamtang sa Department of Environment and Natural Resources.
Namatikdan sa opisyal nga kinahanglan lang nilang husayon ang pipila ka mga katin-awan nga gihimo sa DENR bahin sa usa ka resolusyon ug clearance nga gihimo sa Protected Area Management Board.
Sa sayo pa, si Provincial Board Member Nathaniel Binlod sa ikatulong distrito nipadayag sa iyang plano nga i-require ang DENR nga moatubang sa legislative body aron ipasabot ang mga proseso nga nalambigit sa pag-isyu sa ECC ug unsa kadugay kini.
Si Binlod nipadayag og kabalaka sa daghang mga proyekto nga nalangan tungod sa giingong pagkalangay sa pag-isyu sa ECCs. (RTB)
