GIPAABOT sa kapolisan sa Loon ang pagluwat sa warrant of arrest batok sa suspek kinsa nitug-an kaniadto nga nalambigit sa pagpatay sa usa ka cashier sa tindahan kansang lawas napalgan sa lungsod.
Kasong murder ang gipasaka batok kang Freddie Nocos, ang amo sa biktima nga si Roselyn “Osie” Gaoiran, apan nagpabilin siyang gawasnon samtang nagpaabot sa resolusyon sa evaluation sa huwes sa findings sa piskaliya ug sa pag-isyu og warrant.
Matod sa hepe sa Loon Police Major Ray Olar, si Nocus nihimo og extrajudicial confession apan gibuhian sa kustodiya human ang iyang kanhi warrantless arrest giisip nga dili angay.
Matod ni Olar nga si Nocos gidakop duha ka adlaw human madiskubre ang patayng lawas ni Gaoiran, lapas sa gitugot nga panahon alang sa warrantless arrest pinaagi sa hot pursuit.
“Milapas na man og 17 hours so dili na siya ma inquest, so regular filing nalang mao gipa-release siya,” matod ni Olar.
Sa laing bahin, ang hepe sa Tubigon Police Major Neon Alvarez niingon nga nagpabilin si Nocos sa maong lungsod ug gipaubos sa hugot nga pagbantay.
“Naa ra siya diri. Makit-an namo naa ra sa ila, padayon ra iyang negosyo,” matod ni Alvarez.
Si Nocos, molupyo sa Tubigon, nanag-iya og sari-sari store sa maong lungsod ug nagtrabaho si Gaoiran isip cashier.
Si Gaoiran gikataho nga nawala niadtong Abril 3, 2024 diin napalgan ang iyang lawas nga gisulod sa sako human sa duha ka semana sa hilit nga dapit sa Barangay Cansuaguit, Loon. (RTB)
