USA ka 19-anyos nga Sangguniang Kabataan (SK) chairman namatay tungod sa kuryente samtang nanguna sa pagpangandam sa duwa sa basketball sa lungsod sa Calape niadtong Martes sa gabii (Hunyo 25).
Giila ang namatay nga si Rogelson Barral, residente sa Barangay Binogawan, Calape.
Matod sa Calape Police Station, si Barral nagbutang og sound system ug suga sa usa ka basketball court sa nahisgutang barangay dihang aksidenteng nakuryentihan.
“Ga hikay siya sa mga wirings, ga prepare sa suga ug sound system. Unya dihay poste nga wala mo siga ang bombilya so iyang gi tarong tarong, iyang gisaka unya ila nalang namatikdan na dihay nibuto, unya nahagbong siya [Barral],” matod sa kapolisan sa lunsgod.
Daling gidala si Barral sa duol nga tambalanan apan gideklarar kini nga dead on arrival sa nag-atiman nga mananambal.
Sa pikas bahin, nasakmit sa kapolisan sa Panglao ang shabu nga nagkantidad og P1 milyon gikan sa usa ka 20-anyos nga lalaki nga gi-tag nga “high-value individual” sa anti-drug drive sa gobyerno.
Sa taho, ang kapulisan nagkanayon nga ilang nasikop si Michael Queita, taga Barangay Mansasa sa dakbayan sa Tagbilaran, atol sa buy-bust operation niadtong Huwebes sa gabii (Hunyo 27)..
Nasikop sa mga sakop sa Drug Enforcement Unit sa Panglao Police Station si Queita daplin sa karsada sa Barangay Looc sa Panglao human kini giingong namaligya og shabu sa usa ka undercover nga ahente.
Nakuha sa mga anti-narcotics agents sa possession ni Queita ang upat ka pakete sa shabu nga motimbang og 150 gramos.
Si Queita gibalhog na sa kustodiya sa Panglao Police Station ug gipasakaan siya sa kaso nga kalapasan sa Republic Act 9165, kon Comprehensive Dangerois Drugs Act of 2002. (RTB)
