MIHIMO ang Bohol og mas maisog nga pagtimaan sa diversity ug inclusivity human kini milusad sa unang LGBTQ-plus-themed visual art exhibit sa pagsaulog sa tinuig nga Pride Month.
Gibuksan sa Center for Culture and Arts Development (CCAD) ug Bohol Arts and Cultural Heritage (BACH) Council ang Pabuhagay: Pride Month Art Exhibit niadtong Hunyo 18, 2024 sa Alta Citta, Tagbilaran City.
Napulog walo (18) ka maisog nga LGBTQ+ Boholano artists ang nagpakita sa visual excellence nga gitumong sa pagmugna og kahibalo sa LGBTQ+ community sa Bohol ug sa halapad nga spectrum sa sexual orientation ug gender identity, ingon man ang pagdawat ug pagtugot sa diversity.
Ang mga artista nga gipakita mao sila si Ameril Ampatua, Gil CTLR, F Jordan Carnice, Thirdy Cuadra, John Oliver Janelle Jumarito, John Dave Aceberos Raña, Ryard Josh Adorable, Daneel Potot, Clijster Aile Oguis, Giancarlo Accardi, HJ Raneses, Maria Isabel Cafe, Rezi Pitaya, Inday Noa, Ren Paragados, Marvin Ablao, Jumjum Ouano, ug Yoyo Cabahug.
Si Cabahug, Project Coordinator sa Bohol Pop Contemporary Visual Artists Group (Bohol Pop), nihangop sa mga nanambong ug nihatag ug overview sa exhibit samtang si Ouano, Ex-Officio sa Bohol Pop, maoy nipresentar sa curator’s note ug welcome message.
Sa wala pa ang paglusad, ang mga pakigpulong sa SOGIESC nagpresentar sa Boholano Historian nga si Marianito Luspo sa Shamanism, Babaylanism, ug Gender Fluidity; Lester Ouano, Project Coordinator sa CURLS, Inc., sa SOGIE’s Influence in Arts, Media, and Pop Culture; ug Gavin Michael Cubillo, CCAD Project Development Officer sa mga plano sa CCAD sa Gender and Development.
Sa iyang mensahe, nanawagan si Cubillo nga magmaisugon ang komunidad sa pagpadayag sa ilang pagkatawo ug pakigbisog alang sa visibility ug pagdawat pinaagi sa nagkalain-laing natad, apil na ang arts.
“If not now, then when? Hadlok kaayo nga mu-step into the light, but importante nga naa (nasugdan) ang Pabuhagay ug naa kami kanunay sa CCAD musuporta, among pangusgan nga naa na ning (Pagbuhagay) every year.”
“Kung himoon nato nga mas lig-on ang atong away ug madunggan, basin naay mga kausaban (ug) improvement sa treatment sa LGBTQ+ community. Ari na ta ug dili na ta magpuyo sa kahadlok,” dugang pa niya.
Si Lucell Larawan, Chairperson sa BACH Council Visual Arts Committee, maoy nitambong sa maong kalihukan diin nagpakita usab og vocal ug drag performances gikan sa mga miyembro sa LGBTQ+ community.
Ang ‘Pabuhagay’ gipresentar sa Bohol Integrated Development Foundation, Alta Citta, Bohol Pop, ug gisuportahan sa BrightKids Foundation.
Ang exhibit kabahin usab sa mas dako, mas maisog, ug bag-ong selebrasyon sa Sandugo sa Bohol ubos sa sapa nga ‘Tabo’ nga nagtutok sa mga perya ug expo nga molungtad hangtod sa Hunyo 29.
Nahiuyon sa Strategic Change Agenda ni Gobernador Aris Aumentado ug bisyon sa ABante, ang tumong sa gipalapdan nga selebrasyon sa ‘Sandugo’ mao ang pagpakita sa mga arte ug kultura sa Boholano sa una ug bugtong UNESCO Global Geopark Regenerative Island Province sa Pilipinas.
Para sa mga schedule ug impormasyon bahin sa selebrasyon sa Sandugo sa Bohol, mahimong i-download ang Pedi App sa Play Store para sa Android ug App Store para sa iOS users, o bisitaha ang sandugosabohol.pedi.ph. (RTB)
