GIBUTYAG ni ‘Tigpanalipod’ Atty. Jordan M. Pizarras nga angayan sa Bohol nga dunay ‘Cost of Living Allowance’ (COLA) nga naka index sa inflation rate o ang kataas sa pamalitun.
Kini human sa iyang obserbasyon sa iyang pagsuroy sa mga kalungsuran nga kasagarang yangungo sa katawhan mao man ang kagamay sa sweldo ug kataas sa pamalitun.
“Dinhe sa Bohol, daghang trabahante wala sweldohe ug tarong. Unya lisud kaayo mo reklamo ang mga trabahante sa National Labor Relations Commission kay walay permanente nga Labor Arbiters nga ge assign sa Bohol. Usahay mo adto pa sa Cebu para mo follow-up,” pamahayag pa ni Atty. Pizarras.
“Barato na ang sweldo, mahal pa kaayo ang palaliton. Apil na isda, bugas, grocery ug carne. Hasta plete mahal kaayo. Kuryente mahal pud . Tubig palitun kanunay gumikan kay dili mainum ang motulo sa gripo- ug motulo”, dugang pa niya.
Ang mga suliran niresulya sa kalisod sa pamilyang Bol-anon ilabi na ang dunay mga gipa-skwela.
“Gepasagdan lang ang mga gagmay taw. Wala tagda. Bisag mga senior citizen ga lisud kaayo. Unya hadlokon pa nga kuhaan ug benefits.” (Kahlil Lester O. Camba)
