GIKLARO ni Dr. Stella Marie D. Lapiz hepe sa Office of the Provincial Veterinarian (OPV), atol sa cash assistance distributions sa barangay Mayacabac karong bag-o nga bisan tuod kung wala nay nadiskubre nga kaso sa ASF sa lungsod sa Dauis, basi sa mga test results gikan sa Regional Animal Disease Diagnostic Laboratories, apan ang mga magbabababoy nga apektado sa ASF, dili pa angay nga mubalik pagpamuhi og baboy samtang dili masiguro nga nagmalampuson ang OPV pagwagtang sa hingpit sa ASF nga mitumaw sa pipila ka barangay sa Dauis.
Subay niini, matud ni Lapiz nga ang OPV mismo magbutang og baboy nga buhion didto sa mga tangkal nga nahisulod sa tulo ka barangay sa Dauis diin nagagikan ang mga baboy nga gipangpuo gumikan sa ASF.
Matag bulan, kuhaan kini og blood sample alang sa mga laboratory tests ug kung dili mataptan sa ASF hangtod sa pagdako niini, nagpasabot nga pwede na ang mga hog raisers mubalik sa ilang pagpamuhi og baboy.
Kahinumduman nga gitahasan ni Gobernador Aris Aumentado, ang Provincial Cooperative Development Office (PCDO), pipila na ka buwan ang milabay, nga makig-alayon sa OPV pinaagi kang Dr. Bing Lapiz ug Office of the Provincial Social Welfare and Development (OPSWD), pinaagi kang Carmelita Tecson, pag-organisar sa mga hog raisers, aron makabaton sila sa dugang ayuda sa panginabuhian sama sa pigpen o tangkal og ang suporta sa feeds.
Sa laing bahin gipahigayon sa Kagamhanang Probinsyal ang ASF cash assistance distributions nianang adlawa, para sa mga hograisers nga apektado sa ASF sa barangay Dao, Mariveles ug Mayacabac.
Uban ni acting governor Dionisio Victor Balite, giapod-apod ngadto kanila ang kantidad P266,000, indemnification funds para sa mga anay ug dagko nga mga binuhi nga gihipos P5,000 matag usa ang madawat sa benepisyaryo, P3,000 sa mga gilutas na nga baboy ug P1,000 ngadto sa mga baktin, pondo pinaagi sa OPV.
Sa OPSWD, tag P10,000 ang madawat sa mga benepisyaryo pinaagi sa AICS, ug laing P10,000 ang dugang nga ilang madawat gikan sa AICS-National, subay sa schedule nga gipahiluna sa DSWD.
Nagpasalamat ang punong barangay sa barangay Mayacabac nga si Kapitan Roberto Bongalos kang Aumentado sa mainitong pagsuporta ngadto sa hog industry, ug sa direktiba niini pagpadangat og tabang pinansyal pinaagi sa mga buhatan sama sa OPV, OPSWD ug PCDO.
Atol sa maong kalihukan mihatag usab sa iyang mensahe sa suporta si Dauis Mayor Roman Bullen.
Gipahigayon usab ang pagpanghatag ngadto sa mga barangay livestock aide (BALA), pinaagi kang Mr. Romy Garcia sa OPV, sa honorarium nga nagkantidad og P1,800. matag usa sulod sa bulan sa Hulyo hangtod Disyembre tuig 2023.
Si acting governor Balite, miawhag sa mga benepisyaryo sa mga ayuda nga ampingan ang kwarta gikan sa gobyerno ug magtinabangay alang sa kalamboan taliwala sa mga pagsulay. (RTB)
