BISAN pa sa unom ka buwan nga pagkasuspenso nga gipahamtang kaniya ug sa 68 ka uban pa sulod sa unom ka buwan sukad niadtong Martes, Mayo 28, si Gobernador Erico Aristotle Aumentado nipasalig nga magpadayon ang Kapitolyo sa normal nga operasyon niini.
Giluwatan ni Aumentado ang maong pamahayag human madawat ang suspension order nga giluwatan sa Office of the Ombudsman kaniya ug sa laing 68 ka mga regional ug local officials bahin sa Chocolate Hills resort controversy niadtong Marso ning tuiga.
“Magpadayon ang akong suporta (sa) mga kauban ug magpasalamat ko sa mga trabahador sa Kapitolyo ug (mga) katawhan sa kanunay nga gisuportahan nga suporta kanako,” miingon si Aumentado.
Taliwala sa imbestigasyon, giawhag sa gobernador ang pagtahod ug pagsunod sa mando sa Ombudsman bisan pa man nga mibahad siya nga i-review ang reklamo ug makigtagbo sa ubang mga nasuspenso nga opisyal aron mangayo og legal nga remedyo.
“Dili pod ko maulaw ani, kong unsa ning among giatubang nga hagit karon tungod kay dili ni tungod sa usa ka butang nga korupsyon kun dili mga butang nga nahitabo, o negligence sa ubang tawo nga nadamay lang ‘ta (sa) isip usa ka gobernador. ,” dugang niya.
Gitataw ni Aumentado nga napanunod lang niya ang kontrobersiya. “Kining problemaha, diha na ni (sauna), so collateral damage ra ta aning nahitabo,”.
Sa samang higayon, gihangyo ni Aumentado ang iyang mga kauban sa Kapitolyo nga huptan ang ilang integridad sa trabaho, nga nagpasiugda sa ilang giambitan nga katungdanan ug pasalig sa pagserbisyo sa katawhan.
“Hinaot ko nga atong mga kaigsoonan, labi na ang mga kauban ug trabahador sa Kapitolyo, nga madasig ang ilang (pagka)-madasigon sa trabaho and remember nga magpabilin gyud ang limyo nga pagpanerbisyo sa katawhan.”
Gisubli sa gobernador ang iyang pasalig sa serbisyo publiko. “We will face this and nasayod ang Ginoo nga unsay naa sa akong kasingkasing, the way sa atong paghatag og serbisyo- ang atong limpyo nga pag-panerbisyo.”
Sa pagkasuspenso ni Aumentado, si Bise Gobernador Dionisio Victor Balite maoy magsilbing acting governor, samtang si Senior Board Member Tita Baja maoy acting vice governor.
Ang suspension naglangkob sa kanhi ug karon nga mga opisyal sa probinsiya, mga mayor kansang hurisdiksyon naglakip sa Chocolate Hills, barangay kapitan, ug regional directors sa nagkalain-laing ahensya sa gobyerno.
Gideklara isip protected area niadtong 1997 ni Presidente Fidel Ramos, ang natural nga monumento sa Chocolate Hills gikonsiderar nga usa sa World Heritage Sites sa United Nations Educational, Scientific and Cultural Organization (UNESCO).
Usa usab kini sa 17 ka geosite sa UNESCO Global Geopark Island province, ang una ug bugtong geopark sa Pilipinas nga gideklarar niadtong 2023. (RTB)
