ARON maserbisyuhan ang mga residente ug mga motorista nga mulabay sa mao nga lugar, pormal nang gitugyan ang bag-o lang nahuman nga dalan ug tulay ngadto sa mga komunidad nga giserbisyuhan niini niadtong Marso 28, 2022 pinaagi sa ribbon-cutting ug turn-over ceremonies.
Ang pagpabarog/pagsemento sa kalsada nga galahos sa Barangay Poblacion ug Tomoc, nga ga-agi usab sa Barangay San Jose ug Garcia, nagkantidad og Php28,429,000, samtang ang paggama sa Capayas Bridge sa Barangay Capayas nagkantidad usab og Php6,400,000. Ang kwarta nga gigamit sa pagpatukod niini nagagikan sa General Appropriations Act para sa Fiscal Year 2021, ug kini gi-implementar sa Department of Public Works and Highways (DPWH).
Kini nga mga proyekto gigama aron mas mapalambo pa ang kinabuhi sa mga lumulupyo niini ug pauswagon ang dagan sa mga motorista nga ga-agi niining mao nga mga imprastraktura. Usa sad kini ka pamaagi nga masiguro ang kaluwasan sa mga muagi niining dapita, ilabi na nga ang tulay kanhi ginama sa kahoy, nga makahatag og peligro sa mga motorista.
Sa usa ka simple nga turn-over program nga gipahigayon sa Barangay Capayas, nitambong sad sa mao nga programa ang mga opisyal gikan sa nagkalain-laing komunidad ug DPWH. Naghisgot sila kabahin sa mga benepisyo nga maangkon sa ilang tagsa-tagsa ka mga komunidad niining maong mga proyektuha ug nagpasalamat sa tanan nga nahimong kabahin sa pagpatuman niining mao nga mga proyekto.
Sa iyang bahin, si Kongresista Erico Aristotle “Aris” Aumentado sa Segundo Distrito namahayag sa iyang namatikdan nga importansya sa mao nga imprastraktura ngadto sa mga residente niini ug bisan pa ug usa lamang siya ka mambabalaod, kanunay siyang mangita ug pamaagi nga ayohon ang kinabuhi sa mga lumulupyo niini.
“Tungod sa akong nakita nga ing-ana ka-importante ang mao nga mga imprastraktura, ato kining gipangitaan og pamaagi nga kini mahatag namo diha kaninyo. Akong ikalipay nga itaho kaninyo nga kita maningkamot lang ta gihapon sa inyuhang mga panginahanglan,” matod pa sa mambabalaod. (PR/jja)
