DUL-AN sa P100 milyones ang kantidad sa shabu nga nasakmit sa kapin upat ka bulan nga anti-illegal drugs operations sa kapolisan sa lalawigan sa Bohol.
Sa datos sa Bohol Police Provincial Office (BPPO), mokabat sa P99,419,128 ang balor sa 14 ka kilo ug 620.46 gramos nga shabu ang nasakmit gikan gikan lang sa Enero 1 hangtod sa Mayo 13 karong tuiga.
Ang kinatibuk-ang 257 ka operasyon nga napahigayon miresulta sa pagkasikop sa 268 ka tawo nga nalambigit sa kalihukan sa iligal nga druga apan way marijuana nga nasakmit ang kapolisan.
Gawas sa shabu, nasakmit usab ang 237 ka lain-laing klasi sa armas sa 284 ka operasyon.
Sa laing bahin, 281 ka tawo usab nga gipangita sa balaud ang nadakpan, 71 niini ang most wanted persons samtang 210 ang other wanted persons.
Dugang pa niini, 312 ka operasyon batok sa lain-laing klasi sa sugal ang napahigayon nga miresulta sa pagkasikop sa 869 ka tawo ug P73,926 nga kwarta ang nasakmit.
Subling giklaro ni Col. Lorenzo Batuan, BPPO provincial director, nga wala girecycle sa shabu nga ilang nasakmit.
Ang maong datos nagpamatuod nga ang administrasyong Aumentado-Balite seryoso sa kampanya batok illegal mga druga sanglit subay sa strategic change agenda ni Gobernador Aris Aumentado gilantaw nga mamahimong luwas niini ang Bohol. (RTB)
