TAGBILARAN CITY, Bohol (PIA) –Dili lamang kadtong senior citizen (SC) nga moabut og 100 ang edad ang makadawat og pahalipay sa kagamhanan.
Kini kay human gilagdaan ni Presidente Ferdinand Marcos Jr. and Expanded Centenarian Act niadtong Pebrero, mahimo na nga makadawat og tag P10 mil kadtong makaabut og 80 anyos ug sa matag lima ka tuig hangtud moabut saiya sa 100 ang pangedaron.
Kini maoy gibutyag ni Senadora Aimee Marcos, atul sa pagpakighinabi sa media, Mayo 1, 2024, didto sa Bohol Cultural center.
Si Senadora Marcos, ang kinamanghurang igsoon sa mga anak ni kanhi Presidente Ferdiannd ug Imelda Marcos, misuroy sa Bohol pagtambong sa Saulog Street Dancing atul sa pista ni Senior San Jose.
Ang mahinungdanong lakang pagtahud ug pagpasidungog sa mga senior citizens, napahimo sa kagamhanan ang balaod nga magpamaayo pa sa Senior Citizens Act ug Centenarian Act, nga gisaway tungod kay dyutay na lang ang makabenepisyo ug kasagaran, dili na matagamtam sa mga benepisaryo ang iyang pahalipay s aka tiguwang na.
Gilagdaan ni Presidente Marcos ang RA 11982 o Expanded Centenarian Act nga maghatag og P10 mil nga cash pahalipay sa mga Pinoy, bisan pa kon tua sa gawas sa nasud nga makaabut sa 80, 85, 90, ug 95 anyos.
Hinuon, subay sa nahisgutang balaod, gikinahanglan pa nga kompletohon ang Elderly Data Management System, nga magtumbok ug mag-ila sa mga senior citizens nga masulod sa masakop sa balaod, ilabi na kadtong ang adlaw nga natawhan, magpadangat kanila ngadto sa mismo na 80, 85, 90 ug 95 ug dili 86, 87.
Kini nga database magtudlo sa kinsa nag mga senior citizens nga maapil sa programa.
Si Senador Marcos, kinsa miatubang sa Bohol Media, gikuyogan usab ni Congresista Camille Villar, kinsa naghandum usab nga mosaka isip senador human mapupos ang termino sa iyang inahan nga si Cynthia Villar.
Si Senadora Marcos usab, matud pa ni Gob Erico Aristotle Aoumentado, nagpahiluna sa P1 Bilyon nga pundo nga gigahin alang sa Assistance to individuals in Crisis Situations (AICS) nga gipang-apud-apod sa DSWD dinhi sa Bohol. (PIAbohol)
