ANG Loboc Children’s Choir usa sa mga awardees karong tuiga sa Cultural Center of the Philippines (CCP) ubos sa category B tungod sa talagsaong mga pasundayag niini nga nagpasiugda ug nagpreserbar sa cultural heritage sa Bohol.
Ang mga nakadawat sa prestihiyosong Gawad CCP Para sa Sining 2024 gianunsyo human sa higpit nga proseso sa pagpili ug deliberasyon sa CCP Board of Trustees.
Ubos sa musikal nga direksyon ni Alma Taldo, ang choir nakahatag ug dakong kontribusyon sa pagpalig-on ug pagsaulog sa kultural nga pagkatawo sa mga Boholano ug Pilipino.
Ang kagamhanang probinsiyal ubos sa pagpangulo nila ni Gobernador Erico Aristotle Aumentado ug bise-gobernandor Dionisio Victor Balite miila sa Loboc Children’s Choir sa talagsaong kontribusyon niini sa arts ug sa ilang dedikasyon sa pagpreserbar sa lokal nga tradisyon pinaagi sa musika.
Ang mga pasundayag sa choir dili lamang nagpasiugda sa dato nga kabilin sa Bohol apan nagdasig usab sa mas lawom nga pagdayeg sa talagsaon nga kultural nga pagkatawo nga gipaambit sa tanang Pilipino.
Naporma kaniadtong 1980, ang Loboc Children’s Choir nagsugod sa mga tour sa konsyerto ug nakadaog og mga tropeyo sa mga internasyonal nga kompetisyon, nga nagpakita sa talento sa mga miyembro niini sa entablado sa kalibutan.
Ang Gawad CCP Para sa Sining mao ang pinakataas nga dungog sa CCP alang sa mga artista sa lain-laing mga disiplina, pag-ila sa mga indibidwal o grupo nga makanunayon nga naghimo ug talagsaon nga mga obra o nagpaila sa mga bag-ong estilo, nga nagpauswag sa ilang tagsa-tagsa ka mga porma sa arte.
Kini nga pasidungog nag-ila usab niadtong nakahatag ug dakong kontribusyon sa rehiyonal nga kultura o sa mas lapad nga kultura sa Pilipinas.
Ang award dugang nga nagpasidungog sa mga cultural workers kansang mga paningkamot sa research, curatorship, arts management, o administrasyon adunay importante nga papel sa pagpalambo sa piho nga mga porma sa art o sa pagpalambo sa kultura sa Pilipinas sa kinatibuk-an.
Ang awarding ceremony gikatakda sa Septiyembre 20, sa alas 7:00 sa gabii sa Samsung Performing Arts Theater. (RTB)
