ANG dugay nang gipaabot nga rehabilitasyon sa labing sikat nga beachfront sa Panglao nagsugod na pinaagi sa gimugna nga Task Force Alona ug hiniusang paningkamot sa local government unit sa Panglao ug sa kagamhanang probinsiyal.
Una sa linya mao ang pagpatuman sa dinalian nga mga aksyon nga nasabutan sa rehabilitasyon sa Alona lakip na ang paghawan sa 20 metros nga easement sa baybayon niini.
Si Gobernador Erico Aristotle Aumentado uban ni Bise Mayor Noel Hormachuelos, mga representante ni Mayor Edgardo Arcay, Uco Trotin ug Thomas Boetsch, presidente ug bise-presidente sa Alona Beach Community Association, Inc (ABCAI) nisusi sa Alona Beach niadtong Biyernes, Abril 26.
Ang ABCAI mihatag sa ilang pasalig sa pagdumala sa mga operasyon, nga nagpahayag nga kini makig-alayon sa mga opisyal sa barangay.
Walay estraktura o pasilidad ug vendors ang tugotan nga makabutang sa 20m easement, matod ni Joanne Pinat, Bohol Provincial Tourism Office head.
Ang mga kalihukan sa pagsayaw sa kalayo (fire dances) sa baybayon gidili na usab karon.
Human matuman ang information dissemination activities, dili na itugot ang pag-pull out sa mga dive boat ug island-hopping boats sa Alona area sugod karong Miyerkules, Mayo 1, 2024.
Samtang ang dalan paingon sa Alona sirad-an sa trapiko gawas lang sa mga service vehicle nga magdala og mga suplay ug mga bisita sa mga establisemento sa maong dapit.
Sa kadugayan, ang Task Force Alona motutok usab sa pagsiguro nga anaa ang mga pasilidad sa sewage, saktong drainage, malahutayong kalidad sa tubig ug regulasyon sa mga dive shop.
Ang task force gilangkuban usab sa Municipal Environment and Natural Resources Officer, mga representante gikan sa Panglao Municipal Tourism Office, Municipal Engineer’s Office/Building Official, Bohol Provincial Environment and Management Office, Provincial Tourism Office, Environment Management Bureau sa Department of Environment and Natural. Resources, Philippine Coast Guard, Philippine National Police, Maritime Industry Authority, Department of the Interior and Local Government ug ang Department of Public Works and Highways. (RTB)
