GIAWHAG ang mga employer sa rehiyon nga tugotan ang ilang mga empleyado nga makatagamtam sa mga heat break taliwala sa nagpadayon nga grabe nga kainit.
Si Direktor Lilia Estillore sa Department of Labor and Employment Central Visayas (Dole 7) nibutyag sa SunStar Cebu nga ang pagbayad sa mga kawani bisan nag-heat break usa usab ka matang sa pagpuhonan sa kompaniya.
Samtang, giawhag niya ang mga agalon nga sundon ang gipatuman nga occupational safety ug health protocols, nga giingon nga kini nabutang sa balaod alang sa kaluwasan sa mga trabahante.
Ang mga eksperto sa panglawas ug panahon pareho’ng nagpasidaan sa mga tawo nga kinahanglan nga likayan ang pagpabilin sa gawas sa sulod sa alas 9:00 sa buntag ngadto sa alas 4:00 sa hapon.
Kinahanglan nga dili magpabilin sa direkta nga pagbuwad sa adlaw sulod sa sobra sa 20 minutos kay dili na kini maayo sa panglawas labina sa dunay gihambin nga balatian.
HEAT INDEX
Usa ka eksperto sa Philippine Atmospheric, Geophysical and Astronomical Services Administration (Pagasa) niingon nga ang syudad sa Tagbilaram nitala og record-high heat index nga 39 degrees Celsius sulod sa tulo ka sunodsunod nga adlaw sugod niadtong Lunes, Abril 22, hangtod sa Miyerkules, Abril 24, nisaka sa 39 degrees Celsius sa alas 2:00 sa hapon.
Ang weather specialist nga si Engr. Leonardo ‘Nards’ Samar gikan sa Albur Pagasa Services Division nipasabot sa numero isip extreme caution, nga nagpakita sa posibleng heat cramps, exhaustion, ug bisan heatstroke gikan sa dugay nga mga kalihukan sa gawas.
Gipaabot ni Samar ang dugang pagsaka sa heat index ug surface temperature sa pagsingabot sa Mayo, nga maoy tradisyonal nga pinakainit nga buwan sa Bohol. (RTB)
